“Ura e Zogut”, monument kulture, për vlerat e saj arkitektonike të kohës nuk do të rrezikoje më shembjen pasi kanë nisur punimet përforcuese të saj.
Lajmi u bë i ditur përmes një postimi në rrjetet sociale nga Ministri i Ekonomisë, Kulturës dhe Inovacionit, Blendi Gonxhja, i cili inspektoi nga afër punimet.
Ky investim po realizohet falë financimit nga Qeveria Shqiptare, ndërsa në vijim pritet restaurimi thelbësor, ku ekspertët po verifikojnë thellësinë e zhytjes së themelit dhe ndërthurjen e strukturës mbajtëse të çeliktë me këmbën e urës, veçanërisht për shkak të ndërtimit në mjedis me ujë dhe për shkak të cedimit dhe animit të këmbës së urës.
Ky projekt pritet të kthejë urën për publikun, për qëllime panoramike e pelegrinazhi, një tjetër objekt trashëgimie, të aksesueshëm e të kalueshëm nga vizitorët dhe të shfrytëzueshëm për komunitetin e zonës.
Ura e Matit është një prej veprave më të veçanta inxhinierike në Ballkan dhe njihet si një nga veprat e para inxhinierike, të këtyre përmasave, të shtetit shqiptar.
Projektuar nga inxhinieri zviceran Erëin Schnitter dhe ndërtuar nga firma triestine “Mazorana & Co Triest”, nën drejtimin e inxhinierit Gjovalin Gjadri, ura është e gjatë 480 metra. Ajo u ndërtua me gjashtë harqe (kampata), secili nga 54 metra. Edhe pse një prej pjesëve u dëmtua gjatë Luftës së Dytë Botërore, ura mbetet një dëshmi e forcës krijuese dhe elegancës.
