Goditja e trefishtë e energjisë, ekonomisë dhe çështjeve gjeopolitike, shkaktuan rënien më të madhe vjetore të individëve super të pasur që nga viti 2010. Sipas raportit të pasurisë së Knight Frank të publikuar ditën e mërkurë, 218,000 njerëzit e klasifikuar si “individë me vlerë neto ultra të lartë” (ultra-high net worth individuals, UHNWIs), panë se pasuria e tyre e kombinuar ra me 10%, nga 101.5 trilion dollarë në 2021, në 91.4 trilionë dollarë në vitin 2022. Është rënia më e madhe vjetore e pasurisë së super të pasurve, që kur studimi vjetor u publikua për herë të parë në 2010.
Liam Bailey, kreu i kërkimit të Knight Frank dhe kryeredaktori i raportit të pasurisë, tha se pas shume vite fitimesh të mëdha, shumë të pasurit kishin pësuar një “shok historik”.
“Kriza e Ukrainës nxiti krizën Europiane të energjisë dhe rriti inflacionin,” tha ai.
“Si rezultat, viti 2022 pa një nga ndryshimet më të theksuara të normave botërore të interesit në histori, duke çuar në kushte ekonomike, që fjalori anglisht Collins i quajti mjeshtërisht “permakriza” (permacrisis).
Raporti zbuloi se vetëm 4 në 10 UHNWI, të klasifikuar si ata njerëz me një vlerë neto prej të paktën 30 milionë dollarë, përfshirë banesën e tyre kryesore, kishin rritur pasurinë e tyre vitin e kaluar. “Tendenca e përgjithshme ishte negative,” tha studimi, me rënie në vlerën e pronave rezidenciale, investime në prona tregtare, të ardhura fikse dhe “investime të pasionit”, si arti ose verërat e rralla dhe uiski.
“Rënia e pasurisë nuk është e papritur, duke pasur parasysh strumbullarin dramatik në politikën monetare, që kulmoi me performancën më të keqe për portofolin tradicional të kombinuar, që nga vitet 1930”, tha Bailey.
Europianët pësuan rënien më të madhe të vlerës neto, me një rënie mesatare prej 17%, të ndjekur nga Oqeania me 11% dhe Amerika me rënie 10%. Afrika dhe Azia shënuan rënie më të vogla prej 5% dhe 7% respektivisht.
Pavarësisht rënies së pasurisë së tyre, të pasurit ende kanë shpenzuar miliona në shtëpi të reja luksoze. Vitin e kaluar, në Londër dhe Nju Jork, 43 shtëpi ndryshuan pronësi, me vlera mbi 25 milionë dollarë secila. Kjo përfaqëson një rritje prej 26% të shitjeve mbi pragun “ultra-prime” në Londër, por një rënie prej 35% në Nju Jork. Los Angeles ishte në vendin e tretë me 39 shitje, i ndjekur nga Hong Kongu (28) dhe Miami (23).
“Pavarësisht rritjes së erërave të kundërta ekonomike dhe rritjes së pasigurisë, të pasurit e botës kanë investuar në prona luksoze, me Londrën dhe Nju Jorkun, qytetet më të shquara në kërkesë për shitje ultra-primare”, tha Bailey. Ndërsa këtë vit ka të ngjarë të ndodhë një ngadalësim i shitjeve të nivelit të lartë, rihapja e Kinës dhe oreksi i vazhdueshëm për blerje të drejtuara nga stili i jetesës, do të mbështesin aktivitetin./Monitor
