Njihuni me gruan indiane që mburret me mustaqet
Një grua indiane që mban mustaqe ka marrë vlerësime dhe tallje nga njerëzit në internet. Por ajo thotë se nuk është e shqetësuar nga ky interesim rreth qimeve të fytyrës së saj.
“I dashuroj mustaqet e mia”, deklaron Shyja, 35 vjeçe në statusin e saj në WhatsApp, poshtë një fotoje të saj.
Ajo shpesh pyetet – nga njerëzit që shohin fotot e saj në Facebook ose e takojnë personalisht – pse ajo ka mustaqe.
“Gjithçka që mund të them është se më pëlqejnë. Shumë,” thotë ajo.
Shyja, e cila përdor vetëm një emër, jeton në distriktin Kannur në shtetin jugor të Kerala. Ashtu si shumë gra, ajo kishte fije qimesh mbi buzën e saj për vite me radhë.
Ndërsa rregullisht i hiqte vetullat, Shyja thotë se nuk e ka ndjerë kurrë nevojën për të hequr qimet sipër buzës së saj të sipërme.
Rreth pesë vjet më parë, asaj filloi t’i trashej një mustaqe të dukshme dhe Shyja e kënaqur vendosi ta mbante atë.
“Nuk mund ta imagjinoj të jetoj pa të tani. Kur filloi pandemia e Covid, nuk më pëlqente të mbaja maskë gjatë gjithë kohës sepse më mbulonte fytyrën,” thotë ajo.
Shumë njerëz që e panë i kërkuan që të hiqte mustaqet, por Shyja nuk pranoi.
“Nuk e kam ndjerë kurrë se nuk jam e bukur sepse kam këtë apo atë që nuk duhet ta kisha”.
Grave u thuhet shpesh se qimet e fytyrës janë të padëshirueshme dhe se duhet të paguajnë për t’i hequr ato – ose për t’u rregulluar në formë – rregullisht. Produktet për heqjen e flokëve janë një industri shumë miliardë dollarëshe me kremra, shirita dylli, brisqe dhe epilatorë që synojnë gratë që kanë mundësi të paguajnë për to.
Por vitet e fundit, shumë femra kanë zgjedhur të shkojnë kundër normës duke pranuar dhe madje duke u krenuar me qimet e tyre në fytyrë.
Në vitin 2016, aktivistja për pozitivitet trupor, Harnaam Kaur në foton më poshtë, u bë gruaja më e re në botë që kishte mjekër të plotë, sipas Rekordeve Botërore Guinness. Në intervista, ajo shpesh ka folur se si pranimi i qimeve të fytyrës së saj ka qenë një pjesë e rëndësishme e të mësuarit për ta dashur veten përballë bullizmit.
Për Shyja, të mbash mustaqe nuk do të thotë të bësh një deklaratë, është vetëm një pjesë e asaj që ajo është.
“Unë thjesht bëj atë që më pëlqen. Nëse do të kisha dy jetë, ndoshta do ta jetoja një për të tjerët,” thotë ajo.
Një pjesë e këtij qëndrimi vjen nga lufta me probleme shëndetësore për vite me rradhë. Shyja ka kaluar gjashtë operacione gjatë një dekade – njëra ishte për të hequr një gungë në gjoksin e saj, tjetra për heqjen e cisteve në vezore. Operacioni i saj i fundit ishte një histerektomi pesë vjet më parë.
“Sa herë që dilja nga operacioni, shpresoja që të mos kthehesha më në një sallë operacioni,” thotë ajo.
