TIRANË– Drejtori i Përgjithshëm i Policisë së Shtetit Muhamet Rrumbullaku ka pezulluar nga detyra deri në hyrjen në fuqi të strukturës së re të Policisë së Shtetit, të gjithë drejtuesit vendor të Krimit Ekonomiko-Financiar, në Drejtoritë Vendore të Policisë. Kjo pasi sipas numrit një të Policisë së Shtetitt ata nuk nuk kanë përmbushur detyrtat dhe pritshmëritë. Në arsyetimin e Rrumbullakut thuhet se ka pasur një mungesë të efikasitetit të këtyre strukturave dhe mospërmbushjen e pritshmërive, në luftën kundër evazionit fiskal, paligjshmërive në fushën ekonomike, apo goditjen e korrupsionit.
Vendimi u bë me dije gjatë një takimi të zhvilluar sot nga Ministri i Brendshëm Bledi Çuçi me drejtuesit e Policisë së Shtetit, në nivel qendror dhe vendor. Gjatë takimit, Çuçi mësohet se dha porosi të prera për çdo drejtues vendor të Policisë, për një luftë të pa kompromis kundër kultivimit të kanabisit. Sipas tij, strukturave policore do t’u vijë në ndihmë përdorimi i teknologjisë së lartë, si dhe pamjet e përftuara nga satelitët në monitorimin e rreptë të territorit.
Bledi Çuçi: Për çdo parcelë që do të konstatohet nga agjenci të tjera, do të ketë përgjegjësi individuale, për drejtuesit vendorë. Vëmendje e posaçme duhet t’u kushtohet kontrolleve në ambiente të mbyllura.
Po ashtu ministri kërkoi edhe angazhimin maksimal të strukturave inteligjente dhe ato të Rendit të Policisë, për mbarëvajtjen e fushatës elektorale dhe gjithë procesit zgjedhor të 14 majit, “duke parandaluar dhe goditur me forcën e ligjit, çdo tentativë për shit-blerje vote”.
