Tregu i institucioneve financiare që bazohen në teknologjitë e reja (fintechs) po tërheq një numër në rritje aktorësh në vitet e fundit, si në segmentin e pagesave, ashtu edhe në atë të kredidhënies.
Brenda dy viteve të fundit, Banka e Shqipërisë ka licencuar tetë institucione financiare jobanka që kanë si objekt të aktivitetit të tyre shërbimet e pagesave dhe të mikrokredisë. Së fundmi, edhe një aktor tjetër nga tregu rajonal ka nisur procedurat paraprake për të hyrë në tregun financiar shqiptar.
Bëhet fjalë për kompaninë kosovare Zvilo, subjekt që aktualisht është e licencuar nga Banka Qendrore e Kosovës për aktivitetin e faktoringut.
Megjithatë, Zvilo është një subjekt i regjistruar në platformat e mbledhjes së fondeve (crowdfunding) në Mbretërinë e Madhe dhe këtë vit ka siguruar një financim prej 50 milionë eurosh nga kompania britanike e manaxhimit të aseteve Fasanara Capital, për të mbështetur projektin e transformimit të këtij institucioni financiar në të parën bankë dixhitale në rajonin e Ballkanit Perëndimor.
Zvilo po ndërton një platformë që parashikon huadhënien për SME-të dhe huadhënien konsumatore, të ndërthurur me shërbime të pagesave. Paralelisht me zgjerimin e aktivitetit në shërbimet e reja për tregun Kosovar, Zvilo bën të ditur se ka nisur paralelisht edhe procedurat paraprake për tu licencuar edhe në Shqipëri dhe në Maqedoninë e Veriut.
Më herët, edhe kompania bullgare e mikrofinancës, Easy Credit, ka nisur procedurat për tu licencuar nga Banka e Shqipërisë.
Ndërsa tregu bankar në vitet e fundit po kalon një proces të dukshëm konsolidimi, me uljen e numrit të bankave nga 16 në 11, tregu i fintechs duket në një fazë mjaft dinamike dhe po tërheq investitorë të rinj. Ky interes bazohet në potencialet e mëdha ende të pashfrytëzuara që ka tregu shqiptar në drejtim të përfshirjes financiare dhe paralelisht në zgjerimin e aksesit të publikut në teknologjitë e reja të informacionit dhe komunikimit.
Në sektorin e pagesave, interesi i lartë për fintechs është i lidhur shumë me ligjin e ri “Për shërbimet e pagesave”, që do të sjellë edhe në Shqipëri konceptin e open banking, që do të mundësojë përdorimin e llogarisë bankare për të kryer shërbime pagesash edhe nëpërmjet institucioneve të tjera financiare. Open banking do të mundësojë dy shërbime të reja, atë të inicimit të shërbimit të pagesës dhe të informimit mbi llogaritë.
Ndërkohë, prej disa vitesh tashmë kanë marrë zhvillim të shpejtë tregu i mikrofinancës konsumatore që shfrytëzon teknologjinë për të ofruar shërbim shumë të shpejtë dhe me procedura minimale, por natyrisht me një risk dhe çmim më të lartë të kredisë.
Interesi i lartë i kompanive të reja për shërbime financiare të kreditimit dhe të pagesave është sinjal që tregon se edhe Shqipëria mund të jetë drejt një epoke të zhvillimit të institucioneve fintech, tendencë që në vendet më të zhvilluara është e prekshme prej vitesh./Monitor
