LIBRAZHD–Operacion antidrogë në Librazhd. Policia bën me dije se në kuadër të operacionit të koduar “Çerashta” këtë të hënë është bërë i mundur zbulimi dhe më pas asgjesimi me anë të djegie si 491 bimë narkotike kanabis të kultivuara në zonë të pyllëzuar. Ndërkohë në kërkim janë shpallur dy persona. Vijon puna për identifikimin dhe kapjen e autorëve tjerë të dyshuar.
NJOFTIMI I POLICISË:
Librazhd/Vijon operacioni policor antikanabis i koduar “Çereshta”, finalizohet faza e 3-të. Asgjësohen nëpërmjet djegies, 491 bimë të dyshuara narkotike cannabis sativa, që u gjetën të kultivuara në një zonë të shpyllëzuar. Vijon puna për identifikimin dhe kapjen e autorit/ve. Në dy fazat e para të këtij operacioni janë gjetur 672 fidanë dhe bimë narkotike cannabis sativa, si dhe janë shpallur në kërkim 2 shtetas. Shërbimet e Komisariatit të Policisë Librazhd, në bashkëpunim me shërbimet e Forcës Operacionale të DVP Elbasan, të pajisura me dronë, kanë intensifikuar kontrollet, me qëllim parandalimin, konstatimin dhe goditjen e rasteve të kultivimit të bimëve narkotike. Si rezultat, u finalizua faza e 3-të e operacionit policor antikanabis të koduar “Çereshta”, si rezultat i së cilës, në një zonë të shpyllëzuar, në territorin e fshatit Rinas, njësia administrative Orenjë, janë gjetur dhe asgjësuar nëpërmjet djegies 491 bimë të dyshuara narkotike cannabis sativa. Me bimët e sekuestruara në këtë fazë shkon në 1 163 numri total i bimëve dhe i fidanëve narkotikë cannabis sativa të gjetura dhe të sekuestruara gjatë këtij operacioni. Vijon puna për identifikimin dhe kapjen e autorit/ve të kultivimit të bimëve narkotike të gjetura gjatë fazës së tretë, si dhe për kapjen e 2 shtetasve të shpallur në kërkim më parë. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
