Finalizohet megaoperacioni në Spanjë! Garda Civile ka arrestuar 19 persona në makro-operacionin e kryer në 16 shtëpi të kthyera në “ferma bari”. Aksioni është zhvilluar në: Vendrell, Calafell, Creixell, Cunit, Torredembarra, Roda de Berà, Albinyana dhe Altafulla, zona ku kishte aktivitet një grup kriminal shqiptar. Kontrollet e Policisë, me 200 agjentë të angazhuar, kanë filluar rreth orës 5 të mëngjesit të kësaj të mërkure. Madje në aksion u përdor edhe një helikopter.
Agjentët e Gardës Civile kanë gjetur plantacione kanabisi në 14 nga 16 shtëpitë, në gjendje të ndryshme lulëzimi; ndërsa të arrestuarit kanë kombësi shqiptare dhe ruse, por identitetet e tyre nuk janë bërë me dije.
Kjo është një bandë e organizuar, e cila sjell të huajt në bregdetin e Tarragona për të mbjellë marihuanë, pasi këta njerëz praktikisht nuk dalin nga shtëpia për asgjë,”– tha zëdhënësi i Policisë.
Agjenti vuri në dukje gjithashtu se destinacioni përfundimtar i drogës ishin vendet evropiane.
