Armando Broja, siç ka ndodhur zakonisht në orët e fundit të dritareve të merkatos në këto vite, po pret të mësojë fatin e tij. Sulmuesi shqiptar, larg fushave për një dëmtim, do të mësojë sot në mesnatë se pjesë e cilës skuadër do jetë në Premier Ligë.
Evertoni nuk ka gjetur sulmues tjetër për të afruar në merkaton e dimrit, ndaj ka bllokuar për momentin tentativën për të kthyer Brojën nga huazimi te Çelsi që zotëron kartonin e tij. Kjo dhe fakti që sulmuesi kryesor Kalvert-Ljuin është i dëmtuar, bëjnë që Broja të ketë shanse të mëdha që të vazhdojë të jetë te Evertoni të paktën deri në fundin e këtij sezoni.
Kjo do të ishte zgjidhja më optimale për sulmuesin që do të kalonte me qetësi fazën e riaftësimit dhe do të kishte mundësinë që të merrte minuta deri në mbyllje të këtij edicioni, me shpresën që të bindte Evertonin ta mbante përfundimisht. Në rast kthimi te Çelsi, sezoni i tij mund të cilësohej i mbyllur pasi te blutë londinezë, që luftojnë për objektiva madhorë si kualifikimi në Ligën e Kampioneve, do ta kishte të vështirë të gjente minuta pas kthimit nga dëmtimi.
