Iu larguar 13 lojtarë, por në Ballsh nuk ka vend për panik. Bylisi ka një tjetër skuadër gati për vijimin e garës në Kategorinë e Parë. Në skuadër ka shumë elementë cilësorë, pa llogaritur talentet e moshave dhe ata që kthehen nga huazimet. Duke filluar nga porta në sulm, ka një bazë të shëndoshë.
Katërkëndori i takon Renato Beqajt, por një vlerë e shtuar është edhe 17-vjeçari Rejdi Jahaj. Një tjetër situatë duket në mbrojtje, edhe pse gjërat varen nga ofertat që kanë ekzistuar dhe mund të vijnë në drejtim të futbollistëve.
Trumçi djathtas, në qendër Abazaj e Muçollari, si dhe Loran majtas. Natyrisht që Krenar Skënderaj edhe ky 18- vjeçar nga Ballshi pritet që të ketë më shumë hapësira në ekipin e parë. Pa harruar edhe dy të rinjtë Mehmetaj nga Ballshi dhe Ndreu.
Reparti që ka eksperiencë dhe cilësi, pasi garantojnë emra si: Maçolli, Ruçi, Lajthia e Qoshku. Nga vendësit janë Alimerkaj, por edhe Merkaj e Hyskaj, titullarë me U-19.
Eridon Qardaku apo edhe emra si sulmuesi kryesor në sezonin që sapo u mbyll, Luis Kacorri japin siguri, ndërsa Ergi Hodo, pjesë e skuadrës së Parë dhe asaj U21 dhe një shënues që ka spikatur me moshat pritet që të ketë hapësira në sezonin e ardhshëm.
Në këtë listë po shtojmë edhe ata që do të kthehen nga huazimi dhe nuk janë pak. Vijnë nga Orikumi Roland Shkreli, Ervis Kasaj dhe Rafael Barboza, prej Tomorit Klaus Alinani dhe Serxhio Emini dhe nga Dinamo Babakar Fall dhe Aboubakar Kamara./Panoramasport.al
