TIRANË– Me nisjen e analizës për humbjen në zgjedhjet vendore të 14 majit Partia Demokratike ka ndryshuar dhe sloganin që përshtatet me pretendimiet e kryedemokratit Sali Berisha për një “masakër elektorale” që konsiston në vjedhjen, manipulimin dhe blerjen e votave. “Pa zgjedhje të lira nuk ka zgjidhje” ky është slogani më i ri i demokratëve. Ndërkohë gjatë fjalës së tij Berisha deklaroi se në vendoret e 14 majit 15% e votuesve në Tiranë ishin “votues shëtitës”.
Sali Berisha: Më parë u kam njohur ju dhe kam denoncuar publikisht mbi gjysmë milionë zgjedhës shëtitës fantazmë, të cilët po i veçojmë rreth pas rrethi. Mund t’u them se, ju informoj se në rrethin e Tiranës, në Bashkinë e Tiranës, me një total prej 697 mijë votuesish, 102 mijë prej tyre janë votues shëtitës apo 15 përqind e votuesve të Tiranës. Pra, Tirana ka 1 të pestën e votuesve shëtitës, votues të cilët potencialisht kanë votuar më shumë se njëherë, ose janë dënuar me mosvotim. E para është shumë më e mundshme sepse një investigim pilot i bërë nga emisioni investigativ Piranjat, gjeti siç e dini, drejtori i Erion Veliajt, kishte regjistruar në katër apartamente bosh, nga katër zgjedhës në çdo apartament apo pesë. Pra gjithsej i kishte mbushur me banorë që nuk ekzistonin, përkundrazi zgjedhës të sjellë nga zona të tjera pasi kanë votuar atje, për të hedhur votën për Erion Veliajn. Ky hetim po vazhdon dhe do të vazhdojë rreth për rreth, qendër për qendër, ne do bëjmë publike të gjithë këtë mekanizëm gjigant, shtesë manipulative të farsës elektorale maj 2023.
