TIRANË– Një pako e dyshimtë e kapur këtë të mërkurë në skanerin e Aeroportit të Rinasit ka alarmuar Policinë e Shtetit, e cila është vënë në gatishmëri, bashkë me Forcat e Ndërhyrjes së Shpejtë, forcat xheniere dhe RENEA-n. Por siç bën me dije Policia pas mbërritjes dhe vezhgimit të pakos ka rezultuar se ajo ishte pa probleme.
NJOFTIMI I POLICISË:
Rinas/Informacion paraprak. Shërbimet e Komisariatit të Policisë Rinas janë njoftuar se gjatë skanimit të disa pakove në ambientet e godinës së Kargos, është konstatuar një pako e dyshimtë. Menjëherë pas njoftimit, janë kryer të gjitha veprimet procedurale për sigurinë e shtetasve që ndodheshin në këto ambiente apo pranë tyre. Nga veprimet e shpejta ekzaminuese, të kryera nga Njësia Antieksploziv e Repartit Special RENEA, në bashkëpunim me shërbimet e Komisariatit të Policisë Kufitare Rinas, Forcat e Ndërhyrjes së Shpejtë dhe ato të Drejtorisë së Antiterrorit, rezultoi se pakoja nuk kishte probleme. Grupi hetimor vijon veprimet verifikuese, me qëllim dokumentimin e plotë ligjor të këtij rasti.
