TURQI– Më shumë se 15 mijë persona kanë humbur jetën nën rrënojat e tërmetit tragjik që “shkundi” kufirin mes Sirisë dhe Turqisë disa ditë më parë. E ku në çdo moment vijnë lajme të trishta me trupa të pajetë që nxirren nga rrënojat disa “mrekulli” janë parë si shpresë në mesin e dhimbjes. Bëhet fjalë për 16 foshnjat që ia dolën të mbijetonin nën gurët e ndërtesave dhe sot janë mirë. Pikërisht këta të fundit janë transportuar këtë të enjte me avionin prresidencial nga qyteti i “tmerrit” Kahramanmaras në Ankara.
Fotot emocionuese tregojnë foshnjat në krahët e shpëtimtarëve në bordin e avionit, të mbështjellë me batanije të shumta në mes të një të ftohti në vend. Fotot tregojnë njerëz të grumbulluar së bashku në fluturim duke përqafuar foshnjat, shumë prej të cilëve janë në gjumë, ndërsa transportohen në një vend të sigurt. Foshnjat, të cilat besohet se janë të padëmtuara, tani do të trajtohen në organizatën e fëmijëve në varësi të Ministrisë së Familjes dhe Shërbimeve Sociale.
Foshnjat morën ndihmën e parë e tashmë janë nisur për një monitorim më të imtësishëm të gjendjes së tyre. Ata kanë mbetur fill të vetëm pasi prindërit dhe familjarët e tyre kanë mbetur nën rrënoja. E pranishme në këtë moment të veçantë ishte dhe Emine Erdogan, Zonja e Parë e Turqisë, e cila i ka shoqëruar foishnjat drejt Ankarasë. Deri më tani raportohen më shumë se 15 mijë viktima nga tërmeti i fuqishëm 7.8 ballë.
