Udhëheqësit e vendeve afrikane do të takohen me presidentin rus Vladimir Putin në Shën Petersburg në fund të korrikut në një takim të nivelit të lartë që synon forcimin e bashkëpunimit. Ky takim, i dyti i këtij lloji, vjen ndërsa Moska vazhdon luftën kundër Ukrainës. Udhëheqësit afrikanë do të shkojnë në Shën Petersburg në fund të këtij muaji për takimin Rusi-Afrikë, i dyti i këtij lloji. Takimi po paraqitet si një përpjekje për rritjen e bashkëpunimit në fusha si zhvillimi, siguria dhe paqja, edhe pse Moska vazhdon agresionin e saj kundër Ukrainës.
Takimet ndërkombëtare përfshijnë një element teatri politik, thonë analistët, dhe pjesëmarrja e vendeve afrikane do të jetë një tregues i suksesit për mbledhjen e Shën Petersburgut.
“Mendoj se do të shihet me shumë vëmendje se cilat vende do të marrin pjesë në takim. Herën e fundit, në vitin 2019, kur bota dukej shumë ndryshe përpara fillimit të sulmit të Rusisë ndaj Ukrainës, 43 krerë shtetesh nga Afrika morën pjesë në takimin që u mbajt në Soçi,”- thotë Steven Gruzd nga Instituti i Afrikës së Jugut për Marrëdhëniet Ndërkombëtare.
Sulmi i Rusisë ndaj Ukrainës ka shkaktuar rritjen e çmimeve të ushqimit dhe naftës për shumë vende afrikane.
“Ata janë nën një presion të madh për atë që po ndodh në Ukrainë dhe pasojat e konfliktit atje, për çmimet e mallrave, veçanërisht për afrikanët. Ata janë gjithashtu të shqetësuar me atë që po ndodh me grupin Wagner, kështu që takimi është një mundësi për Rusinë që të përpiqet të mbrojë veten edhe në skenën globale”, thotë Mvemba Dizolele nga Qendra për Studime Strategjike dhe Ndërkombëtare.
Tregëtia ka të ngjarë të jetë një temë kryesore e diskutimit.
“Mendoj se do të flitet për tregëtinë. Tregëtia e Rusisë me Afrikën është vërtet e papërfillshme. Kina dhe BE-ja janë partnerë shumë më të mëdhenj tregëtarë me Afrikën”, thotë Steven Gruzd nga Instituti i Afrikës së Jugut për Marrëdhëniet Ndërkombëtare.
Rusia gjithashtu po përpiqet të gjejë mënyra për të shmangur sanksionet perëndimore.
“Asnjë vend afrikan nuk ka vendosur sanksione ndaj Rusisë, kështu që tregu i Afrikës është fitimprurës për Moskën. Ne pamë një model të ngjashëm pas sulmit ndaj Gjeorgjisë në vitin 2008 dhe sulmit të parë rus ndaj Ukrainës në 2014. Pas mbylljes së tregjeve perëndimore, Rusia u përpoq të zgjeronte qasjen tek tregjet e tjera në Afrikë, Amerikën Latine, dhe Azi”, thotë Gruzd.
Asambleja e Përgjithshme e OKB-së në shkurt miratoi një rezolutë që kërkon që Rusia t’i japë fund luftës dhe të tërhiqet nga territori ukrainas. Ndërsa 141 vende votuan pro, dy vende afrikane votuan kundër dhe 15 të tjera abstenuan.
“Rusia përfitoi sepse kjo ishte një dëshmi për botën se ajo ka disa miq. Është thjesht një zgjim nga ana e vendeve afrikane. Ata po i dërgojnë një mesazh pjesës tjetër të botës se edhe ata i kanë politikat tyre të jashtme që pasqyrojnë interesat e tyre kombëtare.”
Megjithatë, analisti Dizolele shton se thirrja nga një vend për takim me udhëheqësit e një kontinenti të tërë, duket se minon përpjekjet e Afrikës për të afirmuar veten në skenën globale./VOA
