TIRANË– Kryeministri Edi Rama ka mbledhur mesditën e sotme në një takim ministrat e kabinetit të tij qeveritar. Por këtë herë takimi nuk u zhvillua në selinë e Kryeministrisë por në “Vilën 30” në zonën e ish-Bllokut. Ashtu siç shprehej dhe kreu i qeverisë në foton e shpërndarë para nisjes së mbledhjes ky takim kishte në fokus objektivat e vitit 2023 të qeverisë ku sigurisht janë dhe zgjedhjet vendore për 61 bashkitë e vendit. Takimi i sotëm nuk do të jetë i vetmi për kryeministrin pasi siç raportohet ai do të ketë sërish një takim nesër po në “Vilën 30” por tashmë me 12 drejtuesit politik të qarqeve të Partisë Socialiste.
Me afrimin e zgjedhjeve vendore janë intensifikuar dhe takimet e kryeministrit Rama me përfaqësuesit të majtëve në qarqet e vendit. Kujtojmë se vitin e shkuar kishte lëvizje sa i përket drjetuesve politikë, ku ajo që bie më shumë në sy është dërgimi i ministres së Shtetit për Marrëdhëniet me Parlamentin Elisa Spiropali si drejtuese politike në Shkodër ku duket se të gjitha gjasat janë që të majtët të kandidojnë me deputetin socialist Benet Beci përballë kandidatit aktual Bardh Spahia nga radhët e demokratëve.
