PRIZREN– Pas ngjarjes tragjike e cila ndodhi mëngjesin e së martës në lokalin “Kobra City” në Prizren, Inspektorati i Tregut në Komunën e Prizrenit ka mbyllur përkohësisht këtë lokal në mungesë të dokumentacionit. Lajmin për Telegrafin e bëri të ditur drejtori i Inspektoratit në Komunën e Prizrenit, Islam Ukimeri, i cili tha se lokali do të mbetet përkohësisht i mbyllur deri në një vendin të gjykatës në Prizren.
“Sot në orët e para të mëngjesit kemi pas telefonat nga Policia e Kosovës në Prizren dhe me kërkesë të tyre, ne obligohemi menjëherë të dalim në vendin e ngjarjes pasi na kanë njoftuar se në një lokal nate ka pasur gjuajtje me armë. Ne si inspektorat, inspektorati i tregut komunal kemi dal në vendin e ngjarjes. Dhe pasi kemi dal në vendin e ngjarjes, pronarët apo punonjësit që punojnë aty, obligohen të na paraqesin dokumentacion. Ata nuk kanë pasur mundësi që të na paraqesin dokumentacionin pasi disa persona kanë qenë me duar të lidhura nga policia dhe duke ia marr shënimet për rastin në fjalë. Dhe me mos prezantimin e dokumentacionit, ne si inspektorat obligohemi ta mbyllim lokalin përkohësisht. Inspektorat e tregut komunal obligohen ta mbajnë lokalin mbyllur përkohësisht deri në një vendim të gjykatës”, ka thënë Ukimeraj.
Zëdhënësi i policisë rajonale të Prizrenit, Shaqir Bytyqi tha gjithashtu se është kryer bastisje në lokalin ku ka nisur përleshja dhe në shtëpinë e pronarit Dibran Hoxhaj. Në vendngjarje Bytyqi konfirmoi se janë gjetur të paktën tri gëzhoja plumbash si dhe është hasur lokali i demoluar.
“Është kryer bastisja e lokalit si dhe shtëpisë së të dyshuarit. Në vendngjarje anë gjetur së paku tri gëzhoja dhe lokali i demoluar. Aktualisht po vazhdon intervistimi i të dyshuarit dhe personave të tjerë, dëshmitarë okularë si dhe pjesëtarë të stafit të lokalit”, u shpreh ai.
30-vjeçari Visar Cengu u qëllua për vdekje në orët e para të mëngjesit nga Hoxha. Shkak për sherrin dyshohet se është bërë refuzimi për pagesën e faturës 400 euro nga të rinjtë nga Kukësi. Sipas dëshmitarëve në vendin e ngjarjes në fillim ata janë zënë me grushte. Pasi Cengu me miqtë e tij kanë dalë nga lokali, Dibran Hoxha ka dalë po ashtu dhe ka hapur zjarr ndaj tyre. Cengu ndërroi jetë pak minuta pasi u largua me urgjencë nga vendi i ngjarjes ndërsa një nga shokët e tij u plagos, tjetrin fatmirësisht nuk e preken plumbat. Bashkë me Hoxhën në polici janë shoqëruar dhe 5 persona të tjerë që dyshohet të kenë lidhje me ngjarjen.
