Drejtori i komunikimit dhe shtypit në PD, Alfred Lela, në një intervistë me Skype në News 24 të moderatores Ina Qirjo tha se Partia Demokratike, si një parti e djathtë, ka aleatë në administratën e Donald Trump.
Lela tha se Trump, ashtu siç edhe e kishte premtuar, do përpiqet që të sjellë paqen.
“Donald Trump ka thënë se nuk ka pasur luftë gjatë presidencës së tij dhe luftërat kanë nisur gjatë udhëheqjes të së majtës. Trump e ka uruar gjithmonë paqen mes Ukrainës dhe Rusisë. Rusia është një fuqi rajonale jo e vogël, ka arsenal bërthamor. Prandaj, nuk duhet të shikohet me frikë mundësia e bashkëpunimit, mund të nënkuptojë edhe paqe. Këtë ka dashur të thotë presidenti Trump në raport me Rusinë. Trump mund të prezantojë paketë paqeje edhe në lindjen e Europës. PD e Shqipërisë ka aleatë në administratën e Trump. Rama ka dritë-hije me një emër që quhet Charles MCGonigal”, tha Lela.
Më tej, Lela deklaroi se stili i Donald Trump ka rezultuar fitimtar. Ai u shpreh se Europa është konfuze, duke shtuar se partneriteti mes kontinentit europian e amerikan nuk duhet që të diskutohet.
“Donald Trumpi mbajti dy fjalime. Fjalimi i parë ishte më i përmbajtur dhe politikisht më korrekt. Stili i Trump ka rezultuar fitimtar. Trump fitoi gjithçka. Ai u tregua i papërmbajtur, duke thënë se vitet në pushtet të Biden ishin dështim. Pavarësisht se Trump ka një retorikë anti-NATO, nuk besoj se Amerika do të dalë nga Aleanca Veri-Atlantike. NATO pa SHBA do ishte organizatë ushtarake pa kuptim. Kultura e së majtës amerikane është më pranë Europës. Europa duhet të mendojë si fuqi më vete, pasi kemi botë tripolare, ku Europa nuk di vendin e vet. Europa është në përshtjellim dhe konfuze, edhe me Brexit dhe rritjen e së djathtës. SHBA e Europa janë pjesë e një aksi të madh politiko-kulturor që ka të bëjë me Perëndimin dhe vlerat perëndimore”, u shpreh Lela.
