TIRANË– Deputetët e Partisë Demoikratike kanë kërkuar përjashtimin me 10 ditë për ministren e Marrëdhënieve me Parlamentin Elisa Spiropali. Kërkesën ligjvënësit demokratë e mbështesin me arsyetimin se Spiropali gjatë seancës së djeshme ka përdorur gjuhë fyese ndaj deputetit Edmond Spaho. Kërkesa për përjashtimin e Spiropalit është firmosur nga 10 deputetë të Partisë Demokratike.
Ina Zhupa: Kërkojmë zyrtarisht përjashtimin 10 ditë nga kuvendi të Elisa Spiropalit për gjuhën e përdorur në drejtim të deputetit Edmond Spaho. Duke përfituar nga përjashtimi pa rregulla i bërë deputetit Spaho dhe mos prezenca e tij në sallë që të merrte përgjigjen që meritonte, Elisa Spiropali nxorri arsenalin e saj fyes që i shkon përshtat komunikimit që përdorin rilindasit në zyrat e shtetit por që nuk përputhet me kodin etik të kuvendit.Në parlament e kanë bërë zakon të fyejnë dhe të mallkojnë pa pyetur për kod etik sepse kanë kartonat e mandateve të blera që i mbrojnë dhe rregulloren e kanë kthyer në copë letër për recitim parlamentar.
Kjo kërkesë vjen pasi në seancën e djeshme parlamentare ministrja e Shtetit për Marrëdhëniet me Parlamentin Elisa Spiropali ka ironiziuar deputetin e PD-së Edmond Spaho pasi u përjashtua nga parlamenti me 10 ditë, pasi në seancën e kaluar i ka rënë bilbilit dhe ka bllokuar foltoren. Spiropali tha se ai ra “dëshmor” dhe se kujtimi i tij do të jetë i paharruar.
