Kryetari i Grupit Parlamentar të Partisë Demokratike, Gazment Bardhi, reagoi menjëherë me një prononcim për mediat, pasi opozita u largua nga salla e Kuvendit në momentin e votimit të ndryshimeve për Rregulloren.
Ai tha jashtë godinës së Parlamentit se ishin kundër këtyre ndryshimeve te Rregullores se Kuvendit dhe pasi mazhoranca nuk i dëgjoi kërkesat e tyre.
“Pas përpjekjeve tona që nga diskutimet e mëngjesit dhe ato tani, vendosëm të mos përfshihemi në këtë procedurë antikushtetuese”, tha Bardhi.
Deputeti u pyet nëse opozita do dërgonte emrat përfaqësues në të 11 komisionet që po ngrihen dhe pohoi se nuk do të linin asnjë hapësirë boshe dhe se vendimmarrja i takonte grupit parlamentar.
“Ky është një vendimmarrje që do e marrë grupi parlamentar. E sigurt është që ne nuk do të lëmë asnjë hapësirë bosh që i përket opozitës në Parlamentin e Shqipërisë”, tha deputeti demokrat.
Dhe në fund ai njoftoi mbledhjen urgjente të grupit menjëherë pas seancës së mesditës.
“Ne tani po largohemi për një mbledhje urgjente të grupit parlamentar dhe do marrim vendime e do të rikthehemi në seancën e orës 17:00”, përfundoi Bardhi.
