Shefi i Departamentit të Rendit dhe Sigurisë në PD, Avenir Peka, thotë se akuza e SPAK për hetimin pasuror të dyshes Meta-Kryemadhi në 34 vite demokraci, edhe sikur të merreshin të mirëqena, nuk krahasohen me atë se çfarë ka bërë pushteti në këto vite qeverisje me buxhetin e shtetit, që nga dosja e incineratorëve, tuneli i Llogarasë dhe autostrada Thumanë-Kashar, për të cilën KLSH ka konstatuar 8 miliardë euro abuzime.
Në një intervistë për emisionin Kafe Shqeto në Syri TV, Peka tha se ajo se çfarë ndodhi me arrestimin e ish-presidentin Ilir Meta, tregon një përpjekje të Ramës për ta përdorur SPAK për një mandat tjetër qeverisës.
Sipas Pekës, kombinimi SPAK-Polici, tregon mbi të gjitha se Policia është kthyer në strukturë paraushtarake të Ramës. Sipas tij, arrestimi ka qenë politik dhe me urdhër të Ramës.
Ka një element të rëndësishëm që ta lidh me hetimin pasuror ndaj Berishës, aktiviteti i tij tregoi të kundërtën e asaj që u përpoqën të bëjnë. Një individ që ka drejtuar politikën në 34 vite, s’i është gjetur asnjë cent i paligjshëm. Hetimi pasuror e pastroi ndaj akuzave që i janë bërë në këto vite.
Rasti Meta-Kryemadhi, të dy janë politikanë prej dekadash në politikë. Edhe sikur të jetë i mirëqenë fakti se 650 mln euro në këto vite janë vënë nga ato, vetëm në rastin e incineratorëve kemi 400 mln euro, tuneli i Llogarasë, 50 mln euro, autostrada Thumanë-Kashar, 900 mln euro, në 10 vite KLSH ka konstatuar 8 miliardë euro abuzime.
Përtej retorikës, në fakt është përpjekje e Ramës për të përdorur SPAK për një mandat tjetër. Është kombinim SPAK-Polici. Policia është kthyer në strukturë paraushtarake e Ramës. Jo vetëm që dhunon protestuesit, por është akt terrorist arrestimi i Metës. Mund të shkonte shumë më keq po të kishte vepruar Garda, shija më e keqe do ishte përgjegjësia e ministrit të Brendshëm. Nëse Garda do ishte në krye të asaj që ndodhi dje, do kishte gjakderdhje. Ka qenë e qëllimshme, është me urdhër të Ramës. Ose për të pasur incident, ose tentativë s’do ishte çudi për ta eliminuar Metën, por edhe për të intimiduar opozitën.
