TIRANË– Ministri i Mbrojtjes Niko Peleshi ka folur për mediat pas mbledhjes së qeverisë ku ka bërë të ditur se janë miratuar 4 projektvendime. Peleshi u shpreh se dy prej projektvendimeve janë për pjesëmarrje të Forcave të Armatosura në operacione ndërkombëtare për stërvitje. Ndërkohë që dy projektvendimet e tjera janë për emergjencat civile në vend. Ministri shtoi se po ashtu në mbledhje është miratuar dhe një projektvendim, i cili ka të bëjë me një marrëveshje me Italinë për një hua prej më shumë se 30 milionë eurosh.
Niko Peleshi: 4 projektvendime të iniciuara nga Ministria e Mbrojtës janë miratuar ditën e sotme në Këshillim e Ministrave. Dy projektvendimi ishin për pjesëmarrje në operacione ndërkombëtarë. E para është për pjesëmarrjen e FA në operacionin e NATO-së. Ne do të marrim pjesë me një anije të quajtur Iliria dhe 21 pjesëtarë. I dyti është në Egjipt, në operacionin shumëkombësh. Bëhet fjalë për 3 oficerë të policisë ushtarake që do të jetë pjesë e këtij misioni. Dy projektvendime të rëndësishme lidhen me fatkeqësitë natyrore. Kemi vlerësuar hartën dhe kemi gjetur 6 vende ku rrezikohen për fatkeqësitë natyrore. Projektvendimi është për mënyrën se si do të veprohet në këto raste. Projektvendimi i katërt është miratimi i marrëveshjes mes Shqipërisë dhe Italisë për mbështetjen e emergjencave civile në Shqipëri me një hua konçensionare prej më shumë se 30 mln eurosh. Kjo marrëveshje është shumë e rëndësishme.
