TIRANË– Deputeti i Partisë Demokratike Lulzim Basha i është përgjigjur akuzave të bëra gjatë ditës së sotme nga kryedemokrati Sali Berisha. Përmes një postimi në Twitter Basha shkruan se është koha për ti dhënë fund shpifjeve dhe fton Sali Berishën që të votojë për propozimin e tij për vetting-un e politikanëve. Sipas Bashës, kryedemokrati po e mban peng Partinë Demoktratike për interesat e tij persona.
Lulzim Basha: Koha është ilaçi më i mirë. Dhe koha e rrëzoi malin e gënjeshtrave që ngriti para shqiptarëve ai që kërkon me çdo kusht e mjet të mbajë peng PD për interesat e veta personale. Që ti japim fund baltosjes, që të tregojmë kush është i korruptuar e kush jo, kush është peng e kush jo, kush është i lidhur me krimin e kush jo, le të votojmë vetingun për politikanët. Të nisë transparenca nga unë e më pas të gjithë këta që sot e 32 vite mbajnë peng Shqipërinë.
Çfarë deklaroi Sali Berisha sot
Gjatë konferencës së përjavshme me gazetarët në selinë blu Sali Berisha akuzoi ish-paraardhësin e tij se është peng i kryeministrit Edi Rama dhe se ky i fundit mund ti lëshojë kur të dojë një urdhër-arresti kur mos ti duhet më.
Sali Berisha: Lul Basha është në një mision si peng i vërtetë si një njeri që Rama kur të dojë i pret fletën e arrestit me afat burgimi minimumi 6 vjecar. Nuk mund të ketë. Është shndërruar në një vegël të verbër të Edi Ramës.
