Pasditen e sotme u zhvillua Mbledhja e Asalmblesë Kombëtare të Partisë Socialiste, e cila sapo ka përfunduar dhe zgjati rreth 50 minuta. Mbledhja nisi në orën 18:00 dhe përfundoi pak para orës 19:00.
Në këtë takim u zhvillua analiza e zgjedhjeve për pushtetin vendor të 14 majit. Gjithashtu u mbajt dhe një analizë e punës së çdo ministrie po ashtu edhe të strukturave organizative të partisë. Mbledhja u zhvillua me dyer të mbyllura, ku gjatë saj u morën disa vendime, si largimi i sekretarit të Përgjithshëm të PS-së, Damian Gjiknuri dhe emërimi në vend të tij të Blendi Klosit. Po ashtu në vend të Ballës, i cili tashmë është ministër i Brendshëm, u caktua si kreu i grupit parlamentar të PS-së, Bledi Çuçi.
