TIRANË– Kryetari i Partisë Demokratike Sali Berisha ka komentuar për herë të parë audiopërgjimin e publikuar dy ditë më parë nga gazetari investigativ Artan Hoxha nga data e 21 janarit ku drejtuesit Gardës dëgjohesëhin duke urdhëruar vrasjen e katër protestuesve. Duke folur në një konferencë për mediat kryedemokrati tha se audiopërgjimet e dala janë mashtrimet e radhës të ish-Drejtorit të Përgjithshëm të Policisë Ardi Veliu. Berisha i cilësoi sërish atë që ndodhi më 21 janar si një grusht shteti.
Sali Berisha: Që unë të komentoj manipulimet e Ardi Veliut, harroje. I takon medias të thonë të vërtetën e atij manipulimi. Nuk mund të komentoj unë, disa tabela shkrimi që paraqiten si audiopërgjim dhe nuk ekzistojnë. Nuk u paraqit audio, por dëshmoi qartësisht se ishte një manipulim dhe falsifikim. Njëlloj si shiriti i 21 janarit, ku u tha se Sali Berisha ishte i implikuar në problemin e hidrocentralit. Pra, është gjithçka krijesë e Ardi Veliut. Duke thënë këtë, theksoj edhe njëherë se 21 janari përbën një nga ngjarjet më tragjike, përpjekje për grusht shteti, marrje pushteti me dhunë nga ata që i kam denoncuar me kohë. Komuniteti ndërkombëtar dhe në veçanti SHBA, ka hetuar me të madhe që të hetohen organizatorët dhe autorët e dhunës. Edi Rama është personi kryesor, organizator i dhunës. Edi Rama nuk gjeti kurrë kurajo të paraqitej në prokurori, ndonëse u thirr për të dëshmuar. Edi Ramën do e ndjekë gjithë jetën përgjegjësia penale për organizimin e asaj dhune. Ai është faktuar si organizator në mënyrën më të pakundërshtueshme. Pjesa e gardistëve është hetuar nga një kundërshtare e egër e Sali Berishës. Është hetuar me një prani të rëndësishme ndërkombëtare. Dhe janë dhënë dënimet e njohura deri më tani. Por, meqenëse shërbehet me krijime të Ardi Veliut, i them lëri ato, hajde, hiq imunitetin se unë nuk kam imunitet për asgjë, dhe shko dëshmo për organizimin e puçit. I solli si mish për top. Natyrisht, ngjarja është tragjike. Atëherë dhe sot, familjarët kanë ngushëllimet e mia. Por manipulimi që bën Edi Rama për njerëzit që përdori si mish për top se donte të vinte në pushtet, është makabritet.
