Atletja Luiza Gega, e konsideruar si Mbretëresha e atletikës shqiptare, pak ditë më parë stampoi rekordin e ri kombëtar në garën e 3000 metrave me pengesa në Zyrih, ka marrë pjesë në një tjetër disiplinë. Gega konkurroi në gjysmë-maratonën ballkanike, të mbajtur të dielën në Bitola të Maqedonisë së Veriut. Ajo konfirmoi formën fantastike edhe në këtë garë, duke bërë të sajën medaljen e artë. Gega e ndali kronometrin në 1:14:30 për të merituar vendin e parë në gjysmë-maratonë.
Në fund të gushtit Luiza fiksoi rezultatin e saj më të mirë në 3000 m/p, duke vendosur rekordin e ri kombëtar 9:09.64. Ndërkohë disa prej pikave kulmore të këtij sezoni të Luizës janë vendi i tetë në Kampionatin Botëror që u mbajt në Budapest pak ditë më parë. Ajo fitoi Medaljen e artë në Lojërat Olimpike Europiane, duke u konfirmuar si europiania më e shpejtë me rekordin në 3 ligat dhe në historinë e këtij kompeticioni në 3000 m/p. Theksojmë se në çdo garë kampionia kuqezi është gjithnjë brenda normës olimpike, një “Cyborg” që nuk di të ndalet, krenari për një komb të tërë.
