TIRANË– Deputeti i Partisë Demokratike Enkelejd Alibeaj ka folur për herë të parë ditën e sotme që pas vendimit të tij dhe të një pjesë të deputetëve të PD-së për përjashtimin e katër kolegëve të tyre, Oerd Bylykbashi, Tritan Shehu, Agron Shehaj dhe Belind Këlliçi. Nga Saranda ku ishte në një trakim me demokratët Alibeaj tha se ai është drejtuesi i Partisë Demokratike që pas largimit të Lulzim Bashës nga posti.
Enkelejd Alibeaj: Gjej rastin të ndodhem mes demokratëve të Sarandës jo vetëm për të festuar por edhe për të diskutuar gjendjen dhe situatën politike së pari në Sarandë, sfidat që na presin, por edhe për zhvillimet lart në qendër. Unë jam drejtues i PD pas shkëputjes së Lulzim Bashës. Unë jam përfaqësues i gjithë atyre demokratëve që kanë vendosur të shkëputen nga periudha tridhjetë e ca vjeçare e politikës shqiptare. Unë e kuptoj fare mirë hallin e atyre që herë pas here bëjnë këto lëvizje agresioni. Eshtë hall i Sali Berishës dhe Edi Ramës. Jam mësuar tashmë me këto etiketime duke më venë në krah të Edi Ramës. Media e ka bërë publike se kush ka qenë bashkë me Edi Ramën. Ata që janë bashkë kanë arësye hallet e tyre personale.
Dy ditë më parë Enkelejd Alibeaj përjashtoi nga grupi parlamentar katër deputetë, konkretisht, Oerd Bylybashin, Tritan Shehun, Agron Shehajn dhe Belind Këlliçin. Lista e firmëtarëve të këtij vendimi nuk është bërë ende publike ndërkohë të shumtë kanë qenë deputetët që e kanë kundërshtuar këtë vendim. Newszone mësoi mbrëmjen e djeshme se veprimi i Alibeajt ishte bërë nxitimthi pasi donte të prishte kourumin mes deputetëve pas lajmit se deputetët demoktratë kanë firmosur shkarkimin e tij dhe emrimin e Ervin Salianjit në krye.
