TIRANË– Deputeti i Partisë Demokratike Ervin Salianji foli sërish ditën e sotme në lidhje me situatën ku ndodhet PD kur jemi shumë pak muaj larg zgjedhjeve vendore të 14 majit. Ai tha se është e vërtetë që PD nuk është në ditët më të mira dhe kjo është e dukshme teksa shtoi se përplasja që ka aktualisht nuk i bën mirë opozitarizmit në vend. Salianji shprehet se duhet të arrihet një zgjidhje që tu shërbejë qytetarëve.
Ervin Salianji: Unë besoj që me përgjegjësinë dhe të deputetëve të mandatuar do të gjendet një zgjidhje,. I takon deputetëve si personalitete më të rëndësishme politike të PD por edhe individë që kanë marrë mbështetje për të pasur më shumë përgjegjshmëri dhe për të arritur në zgjidhje që u shërbejnë qytetarëve.
I ndalur tek katër përjashtimet e fundit në grupin parlamentar të PD, konkretisht Oerd Byylykbashi, Tritan Shehu, Agron Shehaj dhe Belind Këlliçit, të cilët u përjashtuan me firmën e Enkelejd Alibeajt, Salianji duke folur në emisionin “Kjo Javë” e cilësoi si një veprim bizantin. Për Alibeajn tha se është varianti më i keq i mundshëm i një kreu grupi.
Ervin Salianji: Unë ka qenë një prej njerëzve që kam reaguar ashpër ndaj ngjarjeve të 8 janarit. PD ka nevojë për bashkim për thithjen e çdo individi dhe jo më të ketë luksin për të përjashtuar deputetë. Ka nisur një përpjekje për bashkim, një grup kolegësh në PD nisur nga situata është bërë përpjekje se si mund të bashkohet dhe në kushte kur dëgjohet që ka përpjekje për tu bashkuar vjen një njoftim për shtyp ku thuhet se përjashtohen 4 deputetë dhe kjo është përpjekje brutale. E pasens. Nëse deri në 6 mars kemi bërë beteja të forta është e rëndësishme që partitë politike të demokratizohen. Unë i qëndroj parimit të demokracisë së brendshme. Sjellje bizantine duke përjashtuar deputetë. Këtu nuk bëhet fjalë për tu shkarkuar dikush, por është mendësi bizantine që ndodhi nga Alibeaj. Jemi në kushtet ku duhet të bashkëpunojmë. Duhet të ketë unifikim dhe po gjenden rrugët dhe duhet të gjenden. Nuk është arritur të flitet ende me të gjithë kolegët për shkak se ndodhi kjo ndërhyrja brutale. Ne do të përpiqemi që me konsensualitet të arrihet një mënyra që PD të bashkohet.
