Tiranë – Liderët evropianë janë bashkuar me presidentin e SHBA-së, Donald Trump, në refuzimin e qëndrimit të Rusisë në negociatat për armëpushim me Ukrainën, duke e cilësuar atë si “të papranueshëm”. Deklarata u bë të premten nga kryeministri britanik Keir Starmer, pas një takimi në Tiranë.
“Sapo patëm një takim me presidentin Zelensky dhe më pas një telefonatë me presidentin Trump për të diskutuar zhvillimet në negociatat e sotme. Qëndrimi i Rusisë është qartazi i papranueshëm,” – u shpreh Starmer para gazetarëve.
Ai shtoi se bashkë me presidentin amerikan dhe liderët e Francës, Gjermanisë dhe Polonisë, janë duke përgatitur një përgjigje të koordinuar ndaj qëndrimit rus.
Zelensky në Tiranë: Kërkon sanksione më të ashpra ndaj Rusisë
Presidenti ukrainas Volodymyr Zelensky, i pranishëm në samitin e mbajtur në kryeqytetin shqiptar, deklaroi se Ukraina mbetet e përkushtuar për t’i dhënë fund luftës, por theksoi se Kremlini po zvarrit bisedimet për paqe.
“Nëse Putini vazhdon me këtë qëndrim, komuniteti ndërkombëtar duhet të reagojë me sanksione edhe më të forta,” – u shpreh ai.
Bisedimet e së premtes në Stamboll përbëjnë kontaktin e parë të drejtpërdrejtë mes Ukrainës dhe Rusisë që prej vitit 2022.
