16 maji është afati i fundit që MASR u ka lënë shkollave dhe institucioneve për dorëzimin e modeleve, me të cilat do të punojnë gjatë vitit të ri shkollor 2023-2024.
Përzgjedhja do të bëhet nga katalogu zyrtar i teksteve të miratuara nga MASR, ku çdo shkollë do të përzgjedhë individualisht alternativën më të përshtatshme për të punuar me nxënësit. Mësuesit e klasave dhe ekipeve lëndore fillimisht njihen me të gjitha alternativat e teksteve shkollore të përfshira në katalogun zyrtar të MAS dhe pas diskutimeve për to, do të vendosin për tekstin që do të përdoret në secilën klasë dhe lëndë.
Autoritetet e arsimit sqarojnë se përzgjedhja brenda këtij afati të përcaktuar po realizohet për të gjitha tekstet që do të përdoren nga klasa e parë tek e 12-ta
Tekstet shkollore do të vijojnë të ofrohen falas për të gjithë nxënësit e arsimit të detyruar 9-vjeçar, si dhe për 16 kategori të nxënësve në arsimin e mesëm. Kushti për kthimin e teksteve në fund të vitit shkollor nuk do të jetë më i detyruar për të gjitha klasat e arsimit bazë. Pak muaj më parë, Ministria e Arsimit dhe Sportit vendosi që nxënësit e klasave nga e para deri tek e treta, do të punojnë çdo vit me tekste të reja ndërsa nuk do të ndodh e njëjta gjë me klasat e katërta, e deri tek e nënta, apo edhe ata të gjimnazeve për të cilët do të mbetet në fuqi detyrimi për kthimin e librave në fund të vitit shkollor.
