Nga Gjergj Prenga
Pjesëmarrja e të rinjve në vendimmarrje për qeverisjen vendore mbetet një debat i gjërë në Shqipëri, edhe pse prej disa vitesh ekziston parimi një anëtar, një vote. Në “vendoret” e vitit 2019 opozita i bojkotoi zgjedhjet, duke u zhvilluar kështu një fushatë elektorale “moniste”, me vetëm një parti, që ishte ajo e mazhorancës Socialiste në pushtet. Numri i shqiptarëve me të drejtë vote në “Parlamentaret” e vitit 2021 ishte afërsisht 3.59 milionë qytetarë, ku vetëm 1.66 milion prej tyre iu drejtuan kutive të votimit. Një pjesë rezulton që të jenë larguar jashtë vendit ndërsa të tjerët zgjodhën të bojkotojnë procesin.
Qeverisja vendore në vendin tonë funksionon me parimin e decentralizmit institucional. Në aspektin kushtetues bashkia ka në varësi të saj disa institucione, por të ndara në zyra apo njësi të veçanta që bashkëveprojnë me qytetarët për dokumente apo edhe problematika të ndryshme që këta të fundit të mund të drejtohen për t’i referuar.
Institucioni që ka në mbikëqyrje zgjedhjet, mbi vijueshmërinë dhe transparencën, është Komisioni Qëndror i Zgjedhjeve, i cili kryen procesin e verifikimit të kandidatëve, shmangien e përfshirjes së burimeve shtetërore në zgjedhje, mbrojtjen e administratës nga influencimi i votës, si edhe mbrojtjen e të dhënave të zgjedhësve.
Një ndër problematikat kryesore që Shqipëria ka hasur në zgjedhje, si ato vendore apo edhe parlamentare, ka qenë ndikim i aktorëve të ndryshëm politik mbi administratën shtetërore, ku është kryer “presion” mbi të drejtën dhe lirinë e zgjedhjes për të votuar kandidatin e partisë që është në pushtet.
Sa pjesëmarrës janë të rinjtë në procesin e vendimmarrjes për qeverisjen vendore?
Nga një diskutim i gjërë mes aktorëve politikë, Shoqërisë Civile dhe të rinjve është vërtetuar që të rinjtë kanë në “projeksion” largimin nga vendi më shumë se angazhimin në politikat vendore apo dhe qeveritare. Kjo lidhet me kushtet e punën në Shqipëri, pagat që nuk janë në raport të drejtë me punën që kryhet dhe “joshja” gjithnjë e në rritje e vendeve të BE-së për të rinj të kualifikuar. Angazhimi i të rinjve në politikë apo dhe në jetën komunitare është një problem serioz që ka krijuar një “hemoragji “ që ministria e Rinisë duhet ti japë zgjidhje. Pyetja që shtrohet është a po bëjmë sa duhet për të rinjtë?/NewsZone
