SHKODËR– Detaje të reja janë zbardhur në lidhje me plagosjen e trefishtë me thikë të regjistruar në Shkodër këtë të premte. Raportohet se sherri mes 18-vjeçarit Aldo Hasanit, autori i sulmit me tre adoleshentët, konkretisht: Xhejson Plepi 17 vjeç, Ersid Tula 16 vjeç dhe Kledis Hoxha 16 vjeç ka ardhur pas një debati për ngacmim vajzash. Ata ishin ulur në një kafe në lagjen “Qemal Stafa” ku debati verbal thillimisht degjeneroi më pas në përdorimin e thikës. Mësohet se njëri nga tre adoleshentët e plagosur ka ngacmuar të dashurën e Hasanit.
Kjo gjë e ka acaruar Hasanin, i cili ka kërkuar llogari nga të tre. Por 18-vjeçari kishte shkuar i përgatitur për çdo rast prandaj kishte marrë thikën me vete. Kështu në një moment ai i plagosi të tre duke përgjakur mesditën e sotme Shkodrën. Tre adoleshentët janë dërguar menjëherë në spital ku njëri prej tyre mësohet se ndodhet në gjendje të rëndë shëndetësore për shkak të plagëve të marra nga sulmi me thikë.
Autori i ngjarjes Aldo Hasani është shpallur në kërkim nga polica, e cila po bën krehjen e zonës me qëllim kapjen e ttij. Deri më tani ai ende nuk është vënë në pranga dhe pse kërkimet janë zhvilluar pa ndërprerë nga ana e bluve të Shkodrës.
