KURBIN– Policia e Kurbinit ka dalë me një njoftim zyrtar në lidhje me plagosjen e ndodhur pak minuta më parë pranë gjimnazit në lagjen nr 4 në Laç. Raportohet se një 15-vjeçar i identifikuar me inicialet L.Rr ka mbetur i plagosur në këmbë pasi është qëlluar me armë zjarri nga një 17-vjeçar i idnetifikuar me inicialet A.Gj, i cili pas ngjarjes është arratisur dhe po punohet për kapjen e tij. Raportohet se i plagosuri është dërguar në spital dhe ndodhet jashtë rrezikur për jetën. Plagosja ka ardhur si pasojë e një konflikti të çastit mes adoleshentëve., të dy nxënës të gjimnazit.
NJOFTIMI I POLICISË:
Kurbin/ Informacion paraprak
Rreth orës 12:20, në lagjen nr.4 në Laç, jashtë rrethimit të gjimnazit, pas një konflikti të çastit për motive të dobëta, është plagosur me armë zjarri në këmbë shtetasi i mitur L. Rr. 15 vjeç, nxënës në gjimnaz, banues në Kurbin, i cili është transportuar në spital ku ndodhet jashtë rrezikut për jetën.
Menjëherë me marrjen e njoftimit, shërbimet e policisë kanë shkuar në vendin e ngjarjes dhe falë veprimeve të shpejta hetimore, kanë identifikuar autorin e dyshuar shtetasin A.Gj. 17 vjeç, gjithashtu nxënës i gjimnazit. Shërbimet e Policisë po vijojnë kontrollet me qëllim lokalizimin e kapjen e autorit. Grupi hetimor nën drejtimin e prokurorit, njëkohësisht vazhdon veprimet hetimore në vendin e ngjarjes për zbardhjen e plotë të rrethanave të ngjarjes.
