TIRANË– Protesat e Shoqërisë Civile, qytetarëve dhe organizatave ndërkombëtare të mbrojtjes së monumenteve kanë bërë që ministria e Kulturës të kthejë sytë nga “Ura e Zogiut” në Milot, e cila dita ditës po i afrohet shembjes totale. Ka qenë ministrja e Kulturës Elva Margariti ajo që ka dhënë lajmin se kjo urë me një vlerë të jashtëzakonshme kulturore, artistike dhe mënyrës së ndërtimit do ti nënshtrohet një ndërhyrje emergjente, me qëllim shpëtimin e monumentit nga shembja e plotë. Në një postim në Facebook Margariti ka treguar dhe projektin se si do të ndërhyhet ndërsa shtoi se tashme projekti është miratuar në Këshillin Kombëtar të Trashëgimisë Kulturore Materiale.
POSTIMI I ELVA MARGARITIT:
Miratuam sot në Këshillin Kombëtar të Trashëgimisë Kulturore Materiale projektin e ndërhyrjes emergjente në Urën e Matit. Projekti teknik i zbatimit për ndërhyrjen emergjente në objektin-monument kulture, Ura e Matit” është rezultat i një pune profesorësh e ekspertësh të nderuar të Fakulteti i Inxhinierisë së Ndërtimit në Universitetin Politeknik dhe Instituti Kombëtar i Trashëgimisë Kulturore, që me urdhrin e kryeministrit, u bënë bashkë për hartimin e projektit, brenda një kohe të shkurtër, në kuadër të Paktit për Universitetin. Vetëm pak ditë më parë miratuan gjithashtu projektin e vendosjes së pajisjeve monitoruese, që do të na mundësojnë të dhënat teknike e shkencore për hartimin e projektit të zbatimit. Miratimi i këtij projekti i hap udhë gjenerimit të fondeve, fillimin e detyrave të projektimit dhe nisjen e ndërhyrjeve integrale për zgjidhjen e problemit në terren, në të gjithë objektin. Falënderime profesorëve Markel Baballëku, Neritan Shkodrani, Iralda Xhaferraj, Esmerald Filaj, Ervin Paçi, Rikard Luka, Altin Seranaj, Andrin Kërpaçi, Shkëlqim Daja, që kanë qenë pjesë e këshillimit tonë të vazhdueshëm për këtë vepër inxhinierike komplekse.
