TIRANË– “Mos udhëtoni më shpejt se jeta” ky është apeli që Policia Rrugore ka për të gjithë drejtuesit e mjeteve në rrugët e vendit. Në një njoftim për mediat Policia Rrugore u bën apel qytetarëve që të tregohen të kujdesshëm dhe të respektojnë rregullat be qarkullimit rrugor. Në njoftim bëhet me dije se përgjatë 2 ditëve të para të vitit të ri 2023, kanë intensifikuar monitorimet në akset rrugore dhe në qendrat urbane, me qëllim parandalimin e aksidenteve rrugore.
Në të gjitha akset rrugore, 11 makina inteligjente, 16 radarë automatikë, si dhe dhjetëra patrulla me mjete të paloguara, janë duke monitoruar qarkullimin. Njëkohësisht, vijon monitorimi me përzgjedhje edhe për parandalimin e drejtimit të automjeteve, nën efektin e alkoolit apo në gjendje të dehur.
NJOFTIMI I POLICISË:
Policia Rrugore apelon për të gjithë drejtuesit e mjeteve që të zbatojnë me rigorozitet rregullat e qarkullimit rrugor, të shmangin përdorimin e celularit gjatë drejtimit të automjetit, të shmangin pijet alkoolike kur u duhet të drejtojnë mjetin, të moderojnë shpejtësinë, të vendosin rripin e sigurimit, drejtuesit e motomjeteve të vendosin kaskën mbrojtëse, të mos kryejnë parakalime të gabuara dhe në çdo rast, t’i japin përparësi këmbësorëve. Adrenalina e festës nuk duhet të cënojë jetën. Kontribuoni për sigurinë rrugore
