ELBASAN– Dy inspektorë pyjesh dhe kryeplaku i fshatit Seltë në Elbasan janë ndaluar këtë të martë nga Policia në kuadër të operacionit anridrogë “Krasta“. Përmes një njoftimi për mediat blutë e Elbasanit bëjnë me dije se ata janë ndaluar për akuzën e shpërdorimit të detyrës. Ndërkohë vijon puna për identifikimin dhe kapjen e autorëve.
NJOFTIMI I POLICISË:
Elbasan/Vijon operacioni policor i koduar “Krasta”, i zhvilluar më datë 21.06.2023, për goditjen e një rasti të kultivimit të bimëve narkotike. Në vijim të veprimeve hetimore për këtë rast, ndalohen për shpërdorim detyre, 2 inspektorë pyjesh dhe kryetari i fshatit ku u gjetën të kultivuara 160 bimët narkotike. Specialistët për Hetimin e Krimeve të Komisariatit të Policisë Elbasan, në bashkëpunim me strukturat e Krimit Ekonomik dhe Financiar të DVP Elbasan, në vijim të punës për kapjen e shtetasve të shpallur në kërkim, në zbatim të urdhrit të prokurorit, kanë ndaluar për veprën penale “Shpërdorimi i detyrës”, shtetasit:
Y. Ç., 56 vjeç, me detyrë inspektor pyjesh në zonën e Gjinarit;
F. L., 45 vjeç, me detyrë inspektor pyjesh në zonën e Zavalinës;
K. B., 55 vjeç, me detyrë kryetar i fshatit Seltë.
Hetimi penal ndaj këtyre shtetasve ka nisur në kuadër të veprimeve hetimore të zhvilluara gjatë operacionit policor të koduar “Krasta”, si rezultat i të cilit, më datë 21.06.2023, në një zonë pyjore të fshatit Seltë, njësia administrative Zavalinë, u gjetën dhe u asgjësuan nëpërmjet djegies, 160 bimë të dyshuara narkotike cannabis sativa. Për këtë rast, specialistët për Hetimin e Krimeve të Komisariatit të Policisë kanë identifikuar dhe shpallur në kërkim autorin e dyshuar të kultivimit të bimëve narkotike, shtetasin A. D., 53 vjeç, banues në Tiranë. Vijon puna për kapjen e tij. Materialet procedurale i kaluan Prokurorisë së Rrethit Gjyqësor Elbasan, për veprime të mëtejshme.
