Politika dhe drejtësia bashkë në nderimin e britanikëve të rënë gjatë Luftës së Dytë Botërore

Sot në Tiranë është zhvilluar një ceremoni përkujtimore për ushtarët britanikë të rënë gjatë Luftës së Dytë Botërore në Shqipëri.

Figurat më të larta politike, diplomatike dhe drejtues të institucioneve të rëndësishme të vendit ishin të pranishëm në ceremoninë e zhvilluar në varrezat e ushtarëve britanikë te Liqeni Artificial.

Ambasadori britanik, Alastair King Smith dhe Yuri Kim së bashku me figura politike si Lulzim Basha, Taulant Balla, Belind Këlliçi, Monika Kryemadhi, Pandeli Majko, Fatmir Xhafaj, Elisa Spiropali, Princi Leka Zogu, si dhe kryeprokurori Olsjan Çela, drejtuesja e Këshillit të Lartë Gjyqësor, Naureda Llagami dhe kreu i SPAK-ut, Arben Kraja, kryen nderimet e tyre.

Ceremonia përkujton ushtarët britanikë të rënë gjatë Luftës së Dytë Botërore në Shqipëri.

Gjatë kësaj lufte 52 ushtarakë britanikë dhe të Komonuelthit u vranë në vendin tonë.

Sakrifica e tyre për shumë kohë nuk përmendej në të dhënat historike të Shqipërisë, pasi Britania konsiderohej nga regjimi i shkuar komunist, si vend imperialist armik.

Varrezat memoriale janë ndërtuar  në vitin 1994, në afërsi të vendit ku  autoritetet komuniste kishin varrosur trupat e  ushtarëve të rënë britanikë në një varr të përbashkët të pashënuar, nën një prej rrugëve afër ndërtesës së Universitetit të Tiranës.