TIRANË– Kandidatët për ambasadorë të Shqipërisë do të raportojnë këtë të premte para anëtarëve të Komisionit për Politikën e Jashtme. Kështu pas deklaratës së kandidates për ambasadore në Izrael Meri Kumbe, deputeti demokrat Tomorr Alizoti u shpreh se Kumbe pavarësisht se ka një CV të pasur nuk është për postin e ambasadores në Izrael. Sipas tij diplomacia nuk duhet që të jetë vend qokash por njerëzish që e njohin fuqinë e saj.
Tomorr Alizoti: Do të zgjedhim njohësin më të mirë të atij vendi. Fatkeqësisht politika e jashtme në Shqipëri është kthyer vend qokash. Izraeli është kthyer në vend me rëndësi. Doja të shikoja në Izrael një diplomat që kishte shumë njohje. Cv-ja juaj është shumë e pasur, por mendoj se jeni në postin e gabuar. Duhet të ishit shumë mirë në Unesco. Ambasadori është një figurë e madhe, serioze e një shteti. Ndaj mendoj se nuk duhet të jetë vend qokash. Ka dhe një trupë diplomatike, që kanë vite. Diplomacia ngjan me ushtrinë dhe ka radhë. Politika e jashtme është diçka kombëtare, nuk i përket një partie, por të gjithë shqiptarëve. Duhet të ketë në politikën e jashtme edhe njerëz që nuk e duan kryeministrin, por që mendojnë edhe ndryshe nga ai. Njerëzit shumë të ditur janë dhe rebelë. Respekt për ju, po të ishte për një post tjetër po, por për Izraelin, nuk jam për ju..
Ndërsa deputeti tjetër demokrat Agroin Gjekmarkaj ironizoi kandidaturën e saj për postin e ambasadores. Sipas tij marrëdhëniet mes Shqipërisë dhe Izraelit nuk janë të mira, por se thjeshtë “i kemi gjallë”.
Agron Gjelkmarkaj: Kur bëjmë diplomaci, bëjmë folklor. Me Izraelin nuk kemi marrëdhënie të mira, thjeshtë i kemi gjallë. Nuk e di cila do jetë sfida juaj si ambasadore, do jeni atje për të mbajtur kandilin ndezur të marrëdhënieve me Izraelin, apo do të jeni atje për të çuar para marrëdhëniet siç do duhej të ishte.
