TIRANË– Kandidati i koalicionit “Bashkë Fitojmë” për bashkinë e Tiranës Belind Këlliçi me sa duket ka reflektuar pas vendosjes së posterave në rrugët e Tiranës ku shfaqej me gishtin e mesit lart dhe ka vendosur që ti ndryshojë. Kështu këtë të mërkurë posterat kanë nisur të zëvendësohen me të tjerë. Ndryshe nga foto tjetër, këtë herë duart e Këlliçit janë të bashkuara me mbishkrimin: “Duart e Belos do të ulin koston e jetesës në Tiranë. Nuk të duhet fytyra e tij, por vullneti që ka”!
Një ditë më parë kandidati i opozitës për kryebashkiak të Tiranës u vendos në fokus të kritikave të medias dhe qytetarëve për posterat e shpërndarë në rrugët e Tiranës. Gishti i mesit lart pavarësisht se ishte një mënyrë që Këlliçi zgjdhoi për të iu drejtuar të gjithë atyre që sipas tij kanë kryer korrupsion një veprim i tillë nuk u prit mirë nga banorët e Tiranës që “zhgënjimin” e tyre e pasqyruan në rrjetet sociale.
