Pr.ligji studentët e mjekësisë, Koçiu: Detyrimi ynë të garantojmë shërbim shëndetësor

Ministrja e Shëndetësisë dhe Mbrojtjes Sociale, Albana Koçiu në një intervistë për ABC News ka folur për projektligjin e ri “Për trajtimin e veçantë të studentëve që ndjekin programin e integruar të studimit të ciklit të dytë “Mjekësi e Përgjithshme”, në institucionet publike të arsimit të lartë”.
Koçiu deklaroi se në hartimin e këtij projektligji është mbajtur në konsideratë interesi publik, që është ofrimi i shërbimit shëndetësor për të gjithë qytetarët.
Ministrja shpjegoi se bazuar në rekomandimet e Gjykatës Kushtetuese, ligji u rishikua duke zbatuar vendimin si dhe duke ulur kohën e detyrueshme për të punuar në Shqipëri.
Nga propozimi i parë që ishte 5 vite, Koçiu theksoi se propozimi aktual është 3 vite.
“Ne kemi detyrimin që t’u ofrojmë shqiptarëve shërbim shëndetësor dhe qytetarët shqiptarë kanë nevojë që të marrin shërbim shëndetësor kudo qofshin, që nga Hasi, Kukësi, Dibra Konispoli. Duhet të mbulojmë me shërbim shëndetësor të gjithë vendin”, u shpreh ajo.
Ministrja Koçiu vuri në dukje se “kjo iniciativë ligjore garanton që interesi publik të prevalojë, që shërbimi shëndetësor të ofrohet dhe këta studentë pasi kanë mbaruar shkollën, ofrojnë shërbim për një periudhë 3-vjeçare në vendin e tyre”. “Po flasim për një shërbim jetik, për shërbim shëndetësor për të cilin do duhet të garantohet. Është detyrë qytetare që kushdo nga ne, të ofrojë shërbim pikë së pari në vendin e tij për nevojat dhe kërkesat e qytetarëve, familjarëve, dhe të afërmeve të tij”, shtoi ajo.
Ndërkohë, ministrja e Shëndetësisë bëri të ditur se është rishikuar edhe procedura e punësimit të mjekëve pas përfundimit të studimit.
“E kemi vendosur në ligj procedurën që do duhet të ndiqet për të punësuar mjekët që kanë përfunduar studimet, por ndërkohë do duhet të kryejnë një praktikë për t’u punësuar sipas kërkesave dhe nevojave të Ministrisë së Shëndetësisë. Deri në 3 muaj është detyrimi i Ministrisë së Shëndetësisë për të kryer procedurën e punësimit të këtyre mjekëve dhe në rast se pas tre muajve nuk ka një mundësi, pra të punësimit të tij, do të paguhen të gjithë këta mjekë në masën 80% të pagës së mjekut të përgjithshëm deri në sistemimin në një vend pune nga ana e Ministrisë“, shpjegoi Koçiu.
Ministrja tha se, në rast se në fund të periudhës 1-vjeçare pas përfundimit të studimit nuk ka rezultuar një mundësi punësimi për këta mjekë, ata nuk do të kenë më detyrimin për t’ju mbajtur diplomat.
“Duhet mbajtur në konsideratë diçka që prevalon interesi publik që është ai i të ofruarit shërbim shëndetësor për të gjithë qytetarët dhe ky ka qenë qëllimi kryesor i kësaj iniciative. Ky është qëllimi primar i cili duhet të kuptohet’”, ritheksoi ministrja Koçiu.
E pyetur se përse nuk u gjet një mënyrë tjetër si ajo e shtrenjtimit të tarifave të shkollës, ministrja tha se nuk u pa e drejtë rritja tarifave për shkollimin për të mos rënduar xhepat e familjarëve, por dhe të rinjve që duan të ndjekin një formim të caktuar.
Gjatë intervistës, Koçiu pohoi se kishte takuar mjekë shqiptarë që jetojnë jashtë dhe duan që të kthehen në Shqipëri, për të cilët ajo theksoi se janë të mirëpritur në strukturat publike shqiptare.
“Ndërkohë që dua të theksoj që kam takuar gjatë kësaj periudhe edhe të rinj të cilët kanë përfunduar Fakultetin e Mjekësisë të cilët punojnë sot në spitale rajonale dhe ato bashkiake dhe duan të qëndrojnë po në ato spitale në përfundim të periudhës 3-vjeçare gjë që padiskutim që të mbush me optimizëm”, nënvizoi ajo.
“Kanë zgjedhur të punojnë në spitalet tona për arsyen e vetme që infrastruktura aty është përmirësuar ndjeshëm, se pagat janë përmirësuar ndjeshëm, pajisjet biomjekësore që kanë në përdorim janë përmirësuar dhe janë të fjalës së fundit dhe ata mund ta ushtrojnë detyrën dhe mund ta kryejnë profesionin e tyre njësoj si në të gjithë vendet e tjera”, shtoi ministrja e Shëndetësisë.