TIRANË– Presidenti Bajram Begaj ka thërritur mbledhjen e Këshillit të Sigurisë Kombëtare. Mbledhja do të zhvillohet më datë 23 janar dhe në fokus do të jetë analiza e gjendjes së siguriosë kombëtare dhe prioritetet e vitin 2023. Në njoftimin e shpërndarë për mediat nga zyra e shtypit e Kreut të Shtetit bëhet me dije se përveçse anëtarëve të përhershëm të Komisionit të Sigurisë në mbledhje janë ftuar dhe drejtues të institucioneve që kanë rëndësi për sigurinë kombëtare.
NJOFTIMI:
Presidenti i Republikës, Bajram Begaj në zbatim të detyrimeve kushtetuese dhe ligjore ka vendosur të mbledhë Këshillin e Sigurimit Kombëtar më datë 23 Janar 2023, ora 14:00 me temë: “Analiza e gjendjes së sigurisë kombëtare dhe diskutimi i prioriteteve për vitin 2023”.
Mbledhja e Këshillit të Sigurimit Kombëtar synon që të japë një panoramë të plotë dhe integruar të gjendjes së Sigurisë Kombëtare në Republikën e Shqipërisë dhe të diskutojë prioritetet për vitin në vijim në funksion të angazhimit të plotë, gjithëpërfshirës të institucioneve në garantimin e sigurisë, lirisë dhe mirëqënies së qytetarëve.
Në mbledhjen e Këshillit të Sigurimit Kombëtar janë ftuar të marrin pjesë anëtarët e përhershëm të Këshillit të Sigurimit Kombëtar dhe të ftuar drejtues të institucioneve me rëndësi për sigurinë kombëtare.
