Ditën e sotme presidenti i Republikë së Shqipërisë, Bajram Begaj i shoqëruar nga zonja e Parë Armanda Begaj, u prit në një vizitë shtetërore në Kazakistan, nga Presidenti i Republikës së Kazakistanit, Kassym-Jomart Tokayev. Vizita e tij shënon vizitën e parë të një presidenti nga Shqipëria në Kazakistan, dhe vjen në një kohë kur mbushen 30 vjet nga vendosja e marrëdhënieve diplomatike mes 2 vendeve. Pas ceremonisë shtetërore të pritjes, të dy presidentët zhvilluan një takim kokë më kokë, që u pasua dhe nga një takim midis dy delegacioneve.
Në një prononcim për mediat Begaj u shpreh:
“Një vëmendje e veçantë iu kushtua edhe bashkëpunimit ekonomik, shkëmbimeve tregtare, gjetjen e mundësive të bashkëpunimit midis dy vendeve në fusha me interes reciprok, siç mund të jenë energjia, infrastruktura, bujqësia apo nxjerrja dhe përpunimi i mineraleve.”
Në funksion të afrimit të mëtejshëm të dy vendeve, Presidenti Begaj tha:
“Një çështje me rëndësi tjetër që u diskutua ishte dhe hapja e një Ambasade të Kazakistanit në Shqipëri, e cila u mirëprit nga ana e Presidentit Tokayev.”
Pjesë e diskutimeve të këtij takimi ishte edhe turizmi ku Begaj u shpreh se pati interes të veçantë në drejtim të vendosjes së një linje ajrore të drejtpërdrejtë ndërmjet Kazakistanit dhe Tiranës e cila do t’i shërbejë turizmit.
Pas përfundimit të vizitës së tij Begaj I bëri ftesën presidentit Tokayev për të vizituar Shqipërinë.
