TIRANË– Kryetari i Partisë së Lirisë ka zbardhur detaje nga takimi i një dite më parë me ambasadoren e Shteteve të Bashkuara të Amerikës në Tiranë Yuri Kim. Gjatë konferencës për shtyp ai u pyet nga gazetarët nëse ambasadorja Kim i ka bërë presion për të mos u future në zgjedhje në koalicion me kryetarin e Partisë Demokratike Sali Berisha, i shpallur non grata nga Departamenti i Shtetit. Kreu i PL i mohoi këto zëra duke u shptrehur se SHBA do një opozitë të fortë.
Ilir Meta: Komisioni ka bërë vlerësimin përfundimtar të kësaj liste në bazë të aplikimeve që kandidatët kanë shprehur. Konfirmoj se lista me 26 emrat e parë janë zyrtarisht, pjesa tjetër do zyrtarizohet përfundimisht pasi secili të plotësojë dokumentat. Silva Caka kryeson listën dhe disa nga emrat kryesorë të PL. Kemi hedhur një firmë dhe kemi bërë një ceremoni për të çrrënjosur regjimin. Hapi i dytë do të jetë një ligj ushtrimin e të drejtës së referendumit. Do vendoset kulti mafioz në shpatën e Demokleut.
Pyetje: Takimi me Yuri Kim, a ka pasur presion për të mos patur një koalicion me zotin Berisha, në të kundërt do sanksionoheni dhe ju?
Ilir Meta: Kjo është zero e vërtetë, marrëdhëniet e mia me SHBA janë shumë të hapur dhe parimore. Gjithmonë kam marrë vendimet e mia bazuar në Kushtetutën tonë. Kështu që nuk ka asnjë lloj presioni, përkundrazi kemi pasur një bisedë konstruktive dhe SHBA janë të interesuara për një opozitë shumë të fuqishme, që në vend të funksionojë llogaridhënia. Gjithçka tjetër janë thashetheme të portaleve të kryeministrit. E kam falenderuar Yuri Kim për bashkëpunimin e shkëlqyer me institutin republikan.
