Mbi 1 mijë profesionistë të kujdesit shëndetësor parësor, si mjekë familje dhe infermierë të qendrave shëndetësore 24-orëshe dhe spitaleve bashkiake në vendin tonë, do të jenë më të aftë për dhënien e ndihmës bazë jetëshpëtuese dhe ndihmës së parë.
E gjitha kjo falë projektit SOLIDAR, “Bashkë në Emergjencat Shëndetësore”, iniciativë e qeverisë Zvicerane dhe asaj Shqiptare e zbatohuar nga GFA Consulting Group.
Trajnimi ka nisur me Qendrën shëndetësore 24 orëshe të Vorës, për të vijuar në të gjithë vendit dhe është i koncentruar në tre ditë. Projekti rrit tek bluzat e bardha aftësinë për menaxhimin arrestit kardiak deri tek ushtrimet praktike në ringjalljen kardiopulmonare dhe përdorimin e defibrilatorëve të jashtëm të automatizuar.
Projekti gjithashtu fokusohet në përmirësimin e aksesit në shërbimet cilësore të kujdesit të urgjencës, veçanërisht për popullatat e cenueshme, duke ndërtuar një sistem më elastik të urgjencës shëndetësore në të gjitha nivelet, me synimin për të reduktuar shkallën e sëmundshmërisë dhe vdekshmërisë që lidhen me emergjencat.
Seancat trajnuese zhvillohen nga një ekip trajnerësh të urgjencës mjekësore me eksperiencë të gjatë në shëndetësi si Prof. Doktor dhe njëkohësish shef i Urgjencës në QSUT, Edmond Zaimi dhe Doktoreshë, Albana Kociaj.
Përveç trajnimeve, projekti SOLIDAR ka për qëllim edhe trajnimin e trajnerëve të rinj që do të tejçojnë aftësitë brenda komuniteteve të tyre, për të siguruar qëndrueshmërinë e nismës dhe në të ardhmen.
