TIRANË– Deputeti i Partisë Socialiste Pandeli Majko, i cili njëherazi është dhe i deleguari i selisë rozë për Kukësin ka vënë me “shpatulla pas murit” drejtorin e Kadastres Artan Lame në Komisionin e Ligjeve. Debati lidhej me pronat në Kukës. Majko tha se nuk kupton asgjë nga raporti i Lames, por që ka nevojë që të këtë një pasqyrim më të qartë. Sipas Majkos Kukësi ka probleme të mëdha, sidomos me ata që jetojnë ende në tokat e stërgjyshëve. Me humor e Lamen e ka mik, por si drejtor Kadastre i vjen ta rrahë.
Pandeli Majko: Dy pyetje dhe një koment të shkurtër, për zotin Lame kam një respekt shumë të veçantë, si mik e duart fort, por si drejtor të Kadastrës, është ajo shprehja kush të do të rreh, dhe më vjn ta rrah në fakt. Kjo gjë më vjen kur shoh dhe vlerësoj nga komunikimet situatën e regjistrimit të pronësisë në qarkun Kukës. Ju flisni në terma të përgjithshme, por në thelb unë e përkrah këtë dhe kam vlerësimin tim për punën e Kadastrës, por tjetër problem regjistrimi prone ka Tirana, tjetër Kukësi, tjetër Malësia e Madhe. Në duam dhe jemi të interesuar që analiza vjetore të jetë e ndarë edhe sipas kësaj cilësie. Pra unë jam i interesuar për Kukësin dhe atje problemi bazë nuk është shtëpitë pa leje, por njohja e pronësisë së tokës. Atje janë në tokë të babës, të gjyshit, të stërgjyshit. Ky është një problem, pavarësisht se unë të vlerësoj shumë dhe miqësia jonë nuk vihet në diskutim për këtë gjë. Problemi është që aty gjërat nuk janë zgjidhur. E gjith kjo fillon nga regjistrimi i pronësisë. Ky është diskutimi i parë që bëjnë njerëzit. Mua mu bë qejfi që u krijua kadastra. Unë dua të di për Kukësin çfarë do bëni zotëri, se te ky raport nuk marr vesh asgjë. Janë edhe deputetët e tjerë që interesohen të shohin, Njerëzit duan të dinë a kanë ndonjë matrix, sa duhet të presim? Duket sikur do vdesë dynjaja e s’do marrin letrat e pronësisë. Do të doja mirëkuptimin tuaj edhe nëse në një moment të caktuar kur përmenda rrahjen dhe pse ju keni bërë operacion dhe nuk ua lejon doktori rrahjen.
