TIRANË– Protesta e thirrur nga opozita në orën 17:00 përpara Parlamentit ka ngritur në “këmbë’ Policinë e Shtetit, e cila ka hartuar një plan masash në lidhje me tubimin. Raportohet se një kordon policor do të qëndrojë përballë protestuesve. Ndërkohë Forcat e Ndërhyrjes së Shpejtë dhe skuadrat RENEA do të jenë të pozicionuar brenda oborrit të Kuvendit për çdo precipitim të situatës. 1100 efektivë do të jenë në terren.
Do të jenë punonjësit e rendit dhe ato të forcave “Shqiponja” që do të formojnë kordonin përreth protestuesve, kryesisht në derën e Parlamentit. Forcat e Ndërhyrjes së Shpejtë do të ndahen në tre pjesë. Një pjesë do vendosen në bulevardin “Zhan Dark”, pjesa tjetër brenda rrethimit të Xhamisë së Namazgjasë, dhe një pjesë tjetër brenda ambienteve të parlamentit.
Mësohet se të gjithë efektivët e policisë do të jenë të pajisur me maska kundragaz për çdo situatë. Forca policore do ketë edhe në kryeministri, në rast se protestuesit do zhvendosen aty. Rreth orës 15:00 do ketë kufizime në qarkullimit në rrugën “Xhorxh Bush” dhe pjesërisht në bulevardin “Zhan Dark”, por edhe një pjesë e rrugës së Elbasanit.
