TIRANË– Kandidati i koalicionit “Bashkë Fitojmë” në Bashkinë e Kamzës në zgjedhjet vendore të 14 majit Arjan Hoxha ka deklaruar këtë të enjte para Komisionit Qëndror të Zgjedhjeve se nuk e njeh procesin për të cilin thotë se është i manipuluar. Gjatë fjalës së tij për mediat para KQZ-së ku të rinjtë e Forumit Rinor të koalicionit “BF” ishin mbledhur për të protestuar Hoxha tha se do të kërkojnë ballafaqim të votimit elektronik me atë të printuar, do kërkojnë listat, grup ekspertësh të huaj.
Arjan Hoxha: Kemi pamje filmike, shkëmbime në komunikim Whatsapp dhe mes individëve të pavarur që thonë votova për Arjan Hoxhën dhe më doli Rakip Suli. Kemi qytetarë që thonë e lashë pa përfunduar se nuk punonte. Kërkoj të bëhet ndjekje penale. Më 14 maj votuesit kanë qenë pjesë e një masakre zgjedhore e parafabrikuar me anë të makinerive që kanë bërë identifikimin elektronik. Sot është deklaratë publike e inicuar nga FRPD që kanë bërë fushatë dinjitoze, kemi trokitur në çdo derë e kemi gjetur mbështetjen masive dhe sot në Kamëz është gjendje dramatike, zhgënjyese, e padurueshme se askush nuk e beson rezultatin e zgjedhjeve të 14 majit. S’ka asnjë logjikë statistikore, elektorale. Kjo ka vetëm një formulë të paracaktuar, rezultat të paracaktuar ndaj ne do të inicojmë të gjithë ankesat tona në KAS, KQZ, do kërkojmë të ngrihet grup ekspertësh të huaj se kredibiliteti dhe besueshmëria tek institucionet ka rënë. Po ngremë zërin se kjo i shërben të gjithë Shqipërisë. Ky është sistem pilot që s’ka ndodhur në asnjë palë zgjedhje. Po të lexoni votat, rezultati janë pritshmëritë tona. Si ka mundësi? Çfarë ndodhi në Kamëz? Kjo ishte vetëm formulë e paracaktuar. Të gjithë qytetarët e ndjejnë veten të tradhtuar dhe asnjëri nuk ndihet i përfaqësuar ndaj nuk i heq pikë as presje intimidimit. Është skenë krimi, të vihen nën sekuestro. Duhet një orë e më parë që pajisjet nëse nuk janë shkatërruar, të sekuestrohen se janë në interesin publik.
