SARANDË– Sekretari i organizatës ‘Omonia’, Marin Suli ka qenë i pranishëm në protestën që u mbajt sot në Himarë për lirimin e Fredi Belerit nga burgu. Teksa mori fjalën, ai tha se në ditën që Beleri do të lirohet nga burgu, dhe se burgu politik i rilindjes nuk do ta mbajë dot gjatë Belerin pas hekurave.
“Nga sot falë jush ky shesh ka një emër të ri, është sheshi i dinjitetit të lirisë. Ditën e parë të lirisë së Fredi Belerit, ky shesh do të mbajë emrin e “Shesh i Lirisë”. Dua të ju falënderoj për shansin që na keni dhënë fuqi për të drejtuar Himarën për katër vitet e ardhshme. Vullneti i shumicës për fat të keq u nëpërkëmb duke mbajtur në burg Fredi Belerin.Burgu politik dhe rilindas nuk do ta mbajë dot gjatë Belerin. Ai do të jetë kreu i Bashkisë së Himarës. Dora e zezë e zuzarëve nuk do ta mbajë larg kryetarin nga zyra e Bashkisë. Fitorja jonë, fitorja e Fredit është e padiskutueshme. Janë 4 mijë himarjotë që kanë votuar për Belerin. Lirojeni para se të ju marrë zemërimi i himarjotëve. Ne e kemi zgjedhur fatin tonë dhe drejtuesin tonë”, tha ai.
