Anëtari i kryesisë së Partisë Demokratike-së, Fitim Zekthi foli për zgjedhjet e 24 shtatorit në Kukës dhe mundësisë që PD-ja të caktojë një kandidat, në kushtet kur sot është afati i fundit ligjor për ta dorëzuar një emër pranë institucioneve përgjegjëse.
Ai tha në “Tirana Live” se në Kukës nuk beson se do të ketë kandidat, pasi vetë lëvizja e “Foltores” po krijon pengesë për PD-në zyrtare duke mos mbështetur Arif Rexhmaton si sfidanti e Partisë Socialiste.
“Unë mendoj se nuk ka shpresë. Në Kukës po të kandidonte Rexhmati si kandidat i opozitës do fitonte qartë dhe thellë. Ai ka vetëm një kusht që të kandidojë nën siglën e PD, gjë që nuk pranohet nga Foltorja, Meta dhe Berisha. Qartësisht është evidente, nuk ka dilemë se çdo përpjekje për të mos lejuar kandidimin e një kandidati të opozitës që të jetë Rexhmati është një lëvizje për të mos lejuar një fitore të bashkisë nga PD. Nuk ka dilemë, ka vetëm një mundësi të fitohet që z. Rexhmati nën siglën e PD dhe i vetëm, kjo mundësi po shkatërrohet nga lëvizja e foltores dhe nga Meta”, tha ai.
Ai tha se lëvizja e “Foltores” ka krijuar një akt vetëvrasës në kampin opozitar.
Sipas Zekthit, kjo lëvizje nuk ka për qëllim të fitojnë zgjedhjet në bashkinë verilindore.
“Për mua jo. Nuk besoj se do ketë kandidat. Foltorja ka kohë që ka shkaktuar akt vetëvrasës në opozitë. Foltorja ka synimi politike komplet tjetër nga fitorja e zgjedhjeve. Kjo lëvizje është krijuar që nuk ka të bëjë me politikën. Ne mendojmë se fitohet bashkia me Arif Rexhmatin. Fluksi opozitar duhet të shkojë drejt një kandidati, që nuk po shkohet. Alternativa e “Foltores” nuk është alternativë dhe është e izoluar ndërkombëtarisht”, tha ai.
Ai shtoi se Rexhmati është kandidati i vetëm që mund të fitonte zgjedhjet e pjesshme në Kukës, por kjo qasje nuk po mbështetet nga krahu i Sali Berishës.
“Rexhmati ishte i gatshëm të kandidonte. Në zgjedhjet e kaluar PD e Kukësit në mënyrë të qetë kanë përkrahur kandidatin e “Foltores”. Përvëlon nevoja dramatike për të pasur mundësi për të qenë përballë Edi Ramës”, tha ai.
/ Newszone
