Skuadra e Ajaxit të Amsterdamit duket se e ka humbur busullën plotësisht këtë sezon. “Harkëtarët”, janë mposhtur në duelin përballë rivalëve të betuar të PSV Eindhoven me rezultatin e frikshëm 3-0.
Djemtë e Van Nistelroi, u treguan të pamëshirshëm ndaj kryeqytetasve në takimin e luajtur në Philips Stadion.
Në minutën e 13’, serinë e golave e hapi Luuk de Jong duke realizuar një nga golat më të thjeshtë në karrierë.
Ky ishte goli I vetëm I pjesës së parë të lojës. Në pjesën e dytë, kur pritej reagimi i Ajaxit, vendasit bardhekuqë, goditën përsëri. Ishte Simons, në minutën e 54’ që dysfishoi shifrat me një 11 metërsh me portierin argjentinas të Ajax Geronimo Rulli, që nuk kishte asnjë mundësi për të evituar golin.
Ky gol e goditi moralisht skuadrën rekordmene të Holandës, e cila pësoi pak minuta para fundit të ndeshjes edhe golin e tretë me autor bomberin Luuk de Jong, që Brenda zonës është gjithmonë i saktë.
Me këtë sukses, PSV Eindhoven shkon në kuotën e 65 pikëve, në pozitën e dytë të renditjes ndërsa, nga ana tjetër, Ajax, me 62 pikë në vendin e tretë, rrezikon edhe kualifikimin për në Champions, duke parë që AZ Alkmaar ka mundësi tashmë të shkurtojë diferencën në dy pikë nga kjo pozitë (aktualisht AZ është në kuotën e 57 pikëve).
