BILISHT– Punonjëset e një fasonerie në Bilisht janë ngritur ditën e sotme në protestë. Shkak për këtë protestë është bërë ulja e pagës me 10 mijë lek për pesë punonjëse të firmës, që sipas drejtuesit nuk kanë bërë të gjitha normat e punës. Ndërkohë tjetër shkak i kësaj proteste ishte pushimi nga puna i drejtueses së sindikatës së puntorëve të fasonerive në Devoll, Mirjeta Mulla, sipas saj ajo kishte kërkuar lejen e zakonshme të punës, por menjhërë ka marrë nga punëdhënësi njoftimin për pushim nga puna.
Marjeta Mulla: Kemi bojkotuar punën sepse pronarët më kanë dërguar një njoftim për pushim nga puna vetëm mua që jam kryetare sindikate në këtë fasoneri. Kemi kërkuar të drejtat tona që na jep ligji. Në datën 22 dhjetor kam çuar një kërkesë në të cilën u bëjmë me dije se duhet të marrim 3 ditët e lejes vjetore që ende nuk na i kanë dhënë. Dhe gjithashtu në datën 23 kam dërguar një kërkesë për të ditur arsyen pse disa punëtoreve të fasonerisë u është ulur rroga padrejtësisht. Më pushuan nga puna me pretekstin se do ristrukturohet numri i punëtoreve ndërkohë që këtu kërkohen punëtore çdo ditë.
Punonjëset punojnë me pagën minimale prej 34.000 lekësh në muaj. Sipas protestuesve se vazhdimisht u është mbajtur një shumë lekësh pa arsye nga punëdhënësit. Kjo robaqepsi ka mbi 100 punonjës, afro gjysma e tyre morën pjesë në protestën e organizuar ditën e sotme para vendit të tyre të punës.
Ndërkohë nga ana tjetër administratori i fasonerisë në Bilisht, Fation Shega ka reaguar për mediat pas protestës së punonjësve të fasonerisë. Ai është shprehur për ‘Faxneës’ se kompania që ai administron ka qënë e rregullt sipas ligjit, me pagat, raportet dhe me sigurimet. Mirëpo, Shega shton se është dashur që të bënte shkurtime në staf pasi nuk kanë pasur punë mjaftueshëm.
Fation Shega: Sipas ligjit kemi qenë të rregullt edhe me pagat edhe me raportet dhe sigurimet. Janë të gjitha në sistem dhe i kemi paguar sipas ligjit. Sipas fluksit të punës jam i detyruar të shkurtoj punëtorë pasi nuk nuk kemi shumë punë për momentin. Përfaqësuesja e sindikatës është njoftuar pasi puna nuk ka filluar dhe i kam bërë paralajmërim sipas ligjit që pas një muaji duhet të largohet, nuk është e vetmja pasi do ketë dhe të tjera që do të largohen nga puna. Janë të gjitha të siguruara dhe këto janë vetëm fjalë për kushtet e punës sepse mund të shihni dhe vetë ambientin. Kemi qenë me leje nga data 23 deri më sot. Nuk kam shkarkuar njeri pa të drejtë, i kam dërguar letrën sipas ligjit, jam i detyruar të largoj përfaqësuesen dhe të tjera punetore pasi nuk ka punë mjaftueshëm.
