24 orë ka zgjatur arratia e 42-vjeçarit Klered Bozhanaj, autori i plagosjes së efektivit të Forcave “Shqiponja”, Edlir Alleshi.
Ai ka rënë në prangat e bluve vetëm pak minuta më parë.
Policia e Tiranës njofton se arrestimi i Bozhanajt u bë pas kërkimeve intensive, duke lokalizuar dhe më pas arrestuar 42-vjeçarin. Policia thotë se Klered Bozhanaj ka qëlluar në drejtim të efektivit për ta vrarë atë.
Gjithashtu, uniformat blu kanë sekuestruar armën e krimit si dhe disa gram lëndë narkotike kanabis.
Njoftimi i Policisë
Policia vë në pranga autorin e plagosjes me armë zjarri të punonjësit të Policisë mbrëmjen e djeshme.
Në vijim të veprimeve kërkimore të kryera nga strukturat e DVP Tiranë, për kapjen e autorit të ngjarjes së ndodhur mbrëmjen e djeshme, shtetasit Klered Bozhanaj, 42 vjeç, i cili ka tentuar të vrasë me armë zjarri punonjësin e Policisë, inspektor E. A., ju informojmë se:
Gjatë kërkimeve intensive të zhvilluara për kapjen e shtetasit Klered Bozhanaj, strukturat e Policisë kanë lokalizuar dhe ndaluar autorin e dyshuar.
Në cilësinë e provës materiale është sekuestruar arma e zjarrit pistoletë, e përdorur gjatë krimit.
/ Newszone
